14-mart kúni paytaxtımızdaǵı Ibrayım Yusupov atındaǵı mámleketlik qánigelestirilgen ulıwma bilim beriw mektep-internatında Qaraqalpaqstan Respublikası Baspasóz hám xabar agentligi tárepinen shólkemlestirilgen «Hár bir qala hám awılda zamanagóy kitap dúkanı» akciyası sheńberinde ótkerilip atırǵan «Eń úlgili kitap dúkanı» tańlawınıń respublikalıq basqıshı ótkerildi.


Tańlawdı ótkeriw boyınsha tóreshiler toparı dúzilip, respublikamızdaǵı 19 kitap dúkanı úyrenilip shıǵıp, tańlaw juwmaǵında jeńimpazlar anıqlandı.

 


Shomanaylı jas isbilermen Seydabulla Medetovtıń «Kitaplar álemi» kitap dúkanı birinshi, paytaxtımızdaǵı isbilermen Muratbay Nızanovtıń «Kitaplar dúnyası» kitap dúkanı ekinshi, isbilermen Gúlzar Qutlımuratovanıń kitap dúkanı úshinshi orındı iyeledi.


Sonday-aq, tańlawda «Eń úlgili kitapqumar» nominaciyası boyınsha Maqset Abdullaev, «Eń úlgili kitapxanashı» nominaciyası boyınsha Rawshan Qalmurzaevalar jeńimpaz bolıp, olarǵa shólkemlestiriwshiler tárepinen tayarlanǵan qımbat bahalı sawǵalar hám diplomlar tapsırıldı.


– Húrmetli Prezidentimizdiń qollap-quwatlawı menen «Máhálle» fondınıń qáwenderligi esabınan 500 million sum muǵdarında qarjı ajıratılǵan edi. Kitap dúkanımız ótken jıldıń avgust ayında qurılıp, paydalanıwǵa tapsırıldı. Ol rayon orayındaǵı júdá qolaylı jerde jaylasqan. 2 qabattan ibarat, oqıw bólmeleri bar. Házirgi kúnde kitapxanamız fondında 200den aslam balalar, jáhán hám qaraqalpaq ádebiyatı wákilleriniń bahalı shıǵarmaları orın alǵan, – deydi shomanaylı jas isbilermen, «Kitap álemi» dúkanınıń baslıǵı Seydabulla Medetov.
Ilaj qatnasıwshılarına mektep-internattıń talantlı oqıwshıları tárepinen tayarlanǵan koncert baǵdarlaması qoyıp berildi.

Tárbiya SEYTNAZAROVA,
Qaraqalpaqstan xabar agentligi xabarshısı