Ózbekstan Respublikası Prezidenti Shavkat Mirziyoev Qazaqstan Respublikası Prezidenti Nursultan Nazarbaevtıń mirát etiwine bola 2018-jıl 15-mart kúni ámeliy sapar menen Astana qalasına baradı.
Sapar etiw sheńberinde Ózbekstan delegaciyası Oraylıq Aziya mámleketleri basshılarınıń keń kólemli kún tártibine iye birinshi másláhát ushırasıwında qatnasadı. Bul ushırasıwdı ótkeriw usınısı Prezidentimiz Shavkat Mirziyoev tárepinen BMSh Bas Assambleyasınıń 2017-jıl sentyabr ayında bolıp ótken 72-sessiyasında alǵa qoyılǵan jáne Samarqand qalasında bolǵan «Oraylıq Aziya: birden-bir tariyx hám ulıwma keleshek, turaqlı rawajlanıw hám rawajlanıw jolında birge islesiw» temasındaǵı xalıqaralıq konferenciyada anıq maqsetli baǵdarlama dárejesine shekem rawajlandırılǵan edi.
Ózbekstannıń bul baslaması regionnıń barlıq elleri tárepinen qollap-quwatlanıp, Qazaqstan joqarı dárejedegi birinshi ushırasıwdı Astanada ótkeriwdi usınıs etti.
Mámleketimiz basshısı sol kúni Qazaqstanda Ózbekstan jılınıń rásmiy ashılıw máresiminde qatnasadı.
Sonday-aq, Ózbekstan Prezidenti Shavkat Mirziyoevtiń Qazaqstan Prezidenti Nursultan Nazarbaev penen ushırasıwı da rejelestirilgen.
ÓzA