QARAQALPAQSTANDA BIRINShI MÁRTE KLASTER USÍLÍNDA PAXTA JETISTIRILEDI

Ózbekstan Respublikası Ministrler Kabinetiniń usı jıl 25-yanvardaǵı «Paxta–toqımashılıq óndirisin shólkemlestiriwdiń zamanagóy túrlerin engiziw ilajları haqqında»ǵı qararı tiykarında bıyılǵı jıldan baslap Ellikqala rayonında paxta «Klaster» joybarı sheńberinde jańa usılda jetistiriledi.

Usı maqsette rayonda «Bostan Klaster» juwapkershiligi sheklengen jámiyeti shólkemlestirildi. Joybar sheńberinde bıyıl 11 mıń 40 gektar maydanǵa shigit egilip, hár gektardan ortasha 22 centnerden, jámi 24 mıń 241 tonna ónim alıw rejelestirlmekte.

«Klaster» joybarı boyınsha paxta talshıǵın qayta islew quwatlılıǵı jılına 10 mıń tonna bolıp, onnan 8 mıń 500 tonna iyirilgen jip, sonday-aq, 10 million pogonometr jinsi hám 3 mıń 500 tonna jumsaq súlgi materialları, qalǵan 14 mıń 200 tonnadan zıyat paxta ónimi iyirilgen jip túrinde islep shıǵarıladı. Sonıń nátiyjesinde paxta-toqımashılıq óndirisinde 600 jańa jumıs ornı jaratıladı.


-Búgingi kúnge «Bostan Klaster» JShJ menen paxtashılıqqa qánigelestirilgen 380 fermer xojalıǵı arasında kontraktaciya shártnamaları dúzildi, – deydi Ellikqala rayonı Awıl hám suw xojalıǵı bólimi baslıǵınıń orınbasarı Alımbay Seytimbetov. – Paxtashılıqta respublikamızda birinshilerden bolıp engizilip atırǵan bul jańa usıl fermerlerimizde ayrıqsha qızıǵıwshılıq oyatpaqta.


Qararǵa muwapıq, «Bostan Klaster» JShJ fermer xojalıqlarına jer, suw hám basqa da resurslardan nátiyjeli hám aqılǵa uǵras paydalanıwǵa, onnan alınatuǵın ónimdarlıqtı arttırıwǵa, jetistirilgen paxtanı óz waqtında sepsitpey jıyıp-terip alıwǵa járdemlesedi. Sonday-aq, onı tereń qayta islep, joqarı sapadaǵı ónim islep shıǵarıwdı támiyinleydi. Fermer xojalıqlarına lizing tiykarında texnikalar alıw, mineral tógin, tuqım-shigit, janılǵı-maylaw materialları, paxtanı ximiyalıq hám biologiyalıq usılda qorǵaw hám basqa da materiallıq resurslardı jetkerip beredi. Satıp alınatuǵın paxtanıń bahası fermer xojalıqlarınıń rentabelligi esapqa alınıp, agrotexnikalıq ilajlar tiykarında qáliplestiriletuǵın qárejetlerden kelip shıqqan halda shártnama tiykarında belgilenedi hám mámlekettiń talabı ushın belgilenetuǵın bahadan tómen bolmawı tiyis.


– Bul jańa usıldıń engiziliwi fermer xojalıqlarında paxta zúráátliligin arttırıw menen birge, olardıń istiń aqırǵı nátiyjesine bolǵan qızıǵıwshılıǵın arttırıwǵa xızmet etedi, – deydi Qaraqalpaqstan Respublikası Awıl hám suw xojalıǵı ministrliginiń bas qánigesi Oralbay Qalxanov. – Fermer xojalıqları endi burınǵıday tek jetistirgen paxta shiyki zatınan ǵana emes, bul usıldıń abzallıqlarınıń biri sıpatında, onıń qayta islenip, tayar ónim bolıp shıqqanǵa shekemgi dáramattan tiyisli úleslerin aladı hám bul olardıń ekonomikalıq jaǵdaylarınıń jaqsılanıwına unamlı tásirin tiygizedi.

D.ABIBULLAEV

Qaraqalpaqstan xabar agentliginiń xabarshısı

  13.03.2018, 16:16  |    90 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi