Sóylesiwlerden soń erisilgen kelisimler boyınsha hújjetlerge qol qoyıw máresimi boldı.
Ózbekstan Respublikasınıń Prezidenti Shavkat Mirziyoev hám Tájikstan Respublikasınıń Prezidenti Emomali Raxman Doslıq hám jaqsı qońsıshılıqtı bekkemlew wáqqında qospa bayanlama, Ózbekstan-Tájikstan mámleketlik shegarasınıń ayrıqsha uchastkaları haqqındaǵı shártnamaǵa qol qoydı.
Sawda, ekonomika, investiciya, qarjı, transport hám tranzit, awıl xojalıǵı, suw-energetika, salıq, bajıxana, turizm, ilim-bilimlendiriw, densawlıqtı saqlaw, mádeniyat, qáwipsizlik hám jınayatshılıqqa qarsı gúresiw tarawlarındaǵı birge islesiw hám de aymaqlararalıq baylanıslardı rawajlandırıwǵa baǵdarlanǵan jámi 27 dana hújjetke qol qoyıldı.
Usı salmaqlı hújjetler toplamı ellerimiz hám tuwısqan xalıqlarımız arasındaǵı óz-ara paydalı birge islesiwdi hár tárepleme rawajlandırıw ushın jańadan huqıqıy tiykar jaratadı.
Baspasóz ánjumanında Shavkat Mirziyoev hám Emomali Raxman sóylesiwler dosshıl, ashıq hám ámeliy ruwxta ótkenin, sóylesiwler nátiyjesinen quwanıshlılıǵın atap ótti.
«Biz Ózbekstan hám Tájikstannıń miyamiy, sawda-ekonomikalıq, energetikat hám basqa da tiykarǵı tarawlardaǵı qatnasıqlardı bekkemlewge tiyisli áhmiyetli máselelerdi dodaladıq. Bunıń nátiyjesi sıpatında áhmiyetli hújjetler-Mámleketlik shegarası boyınsha shártnama hám Puqaralardıń óz-ara qatnawı haqqında kelisimge qol qoyıldı. Búgin erisilgen tariyxıy kelisiwler tek xalqlarımız ushın emes, bálkim pútkil region ushın úlken áhmiyetke iye», dedi mámleketimiz basshısı.
Xabar etilgenindey, Ózbekstan hám Tájikstan arasındaǵı tovar almasıw kólemin áwele 500 million dollarǵa jetkeriw tuwrısında sóz barǵan edi. Mámleket basshılarınıń nátiyjeli sóylesiwleri, isbilermen sheńberlerdiń pikirlesiwi nátiyjesinde bul kórsetkish 1 milliard dollarǵa alıp shıǵılatuǵın boldı.
Prezident Shavkat Mirziyoev Ózbekstan hám Tájikstan arasında sheshilmegen máseleler qalmaǵanlıǵın atap ótti. Prezident Emomali Raxman bul pikirdi tolıq qollap-quwatladı.
Tárepler ellerimiz arasındaǵı qatnasıqlardı óz-ara isenim, doslıq hám jaqsı qońsıshılıq tiyuarında bunnan bılay da bekkemlewge umtılıwın bildirdi.
ÓzA