Ózbekstan Respublikası Prezidenti Shavkat Mirziyoev Prezident Imamali Rahmannıń mirát etiwine bola 9-mart kúni mámleketlik sapar menen Tájikstanǵa jónep ketti.
Burın xabar etilgenindey, joqarı dárejedegi sóylesiwlerde eki mámleket arasındaǵı siyasiy, sawda-ekonomikalıq, investiciyalıq, qarjılıq, transport-kommunikaciyalıq, turizm, mádeniy-gumanitar tarawlardaǵı hám aymaqlararalıq birge islesiwdi rawajlandırıw, puqaralardıń óz-ara sapar etiwlerin jeńilletiw máseleleri dodalanadı, táreplerdi qızıqtırǵan aymaqlıq hám xalıqaralıq mashqalalar boyınsha pikir alısıladı.
Sóylesiwlerdiń juwmaqları boyınsha Prezidentlerdiń Birliktegi bildiriwi, Ózbekstan – Tájikstan mámleketlik shegarasınıń ayrıqsha uchastkaları haqqındaǵı shártnama, Puqaralardıń óz-ara qatnawı haqqındaǵı kelisimge, sonday-aq, túrli tarawlarda birge islesiwdi rawajlandırıwǵa hám bekkemlewge qaratılǵan jámi 25 ten aslam hújjetke qol qoyılıwı rejelestirilgen.
Bunnan tısqarı, sapar sheńberinde ótkeriletuǵın biznes-forum hám Ózbekstan milliy sanaat kórgizbesinde kommerciyalıq shártnamalarǵa hám ekonomikanıń túrli tarmaqlarındaǵı kooperaciyaǵa baylanıslı kelisimlerge qol qoyılıwı názerde tutılǵan. Eki eldiń kórkem óner sheberleriniń qatnasıwında koncert shólkemlestiriliwi de mólsherlengen
ÓzA