Ózbekstan Respublikası Prezidenti Shavkat Mirziyoev 6-mart kúni eki tárepleme vedomstvolararalıq másláhátlesiwler ótkeriw ushın elimizge ámeliy sapar menen kelgen Rossiya Federaciyası qarjı ministri Anton Siluanovtı qabıl etti.
Mámleketimiz basshısı miymandı shın júrekten qutlıqlar eken, joqarı dárejedegi turaqlı ushırasıwlar hám sóylesiwler, erisilgen kelisimler menen qabıl etilgen shártnamalardıń ámelge asırılıp atırǵanı ellerimiz arasında strategiyalıq sheriklikti hám awqamlaslıq qatnasıqların, kóp qırlı, sonıń ishinde, qarjı tarawındaǵı birge islesiwdi keńeytiwge xızmet etip atırǵanın ayrıqsha atap ótti.
Búgingi kúnde eki eldiń qarjı ministrlikleri arasında Ózbekstan Respublikası Prezidentiniń ótken jılı aprel ayında Rossiya Federaciyasına mámleketlik saparı waqtında qol qoyılǵan Birge islesiw haqqındaǵı memorandum sheńberinde tıǵız óz-ara birge islesiw jolǵa qoyılǵanı kewil tolıwshılıq penen atap ótildi.
Ushırasıwda qarjı tarawındaǵı nátiyjeli sóylesiwdi bunnan bılay da rawajlandırıwdıń perspektivaları kórip shıǵıldı.
Qarjı, salıq hám bajıxana uyımların modernizaciyalaw, byudjetti rejelestiriw, jergilikli byudjetlerdiń teńsalmaqlılıǵına erisiw, qarjını qadaǵalaw boyınsha nátiyjeli mexanizmlerdi jetilistiriw hám basqa da baǵdarlar boyınsha aldınǵı tájiriybe, texnologiyalar hám bilimlerdi tartıw máselelerine ayrıqsha itibar qaratıldı.
Qospa joybarlardı qarjılandırıw, Rossiyanıń jetekshi bilimlendiriw mákemeleri tiykarında taraw ushın joqarı mamanlıqtaǵı qánigelerdi tayarlaw baǵdarında birge islesiw imkaniyatları dodalandı.
Rossiya qarjı ministri mámleketimiz basshısına shın júrekten qabıllaw ushın minnetdarshılıq bildirip, Rossiya Federaciyası Prezidenti Vladimir Putin hám húkimeti Baslıǵı Dmitriy Medvedevtiń sálemin hám jaqsı tileklerin jetkerdi.
Anton Siluanov Rossiya ellerimiz arasında qarjı tarawındaǵı keń kólemli hám óz-ara paydalı ámeliy birge islesiwdi rawajlandırıwdan hám tereńlestiriwden mápdar, bul baǵdardaǵı sherikshilikti dawam ettiriwge tayar ekenin bildirdi.
ÓzA