6-mart kúni Oliy Majlis Nızamshılıq palatasınıń gezektegi májilisinde deputatlar nızamnıń ústinligin támiyinlewge hám sud-huqıq sistemasın bunnan bılay da reformalawǵa, sudlardıń jumısına zamanagóy málimleme-kommunikaciya texnologiyaların engiziwge baǵdarlanǵan bir qatar nızam joybarların kórip shıqtı. Sonday-aq, deputatlar turizm industriyasın jedel rawajlandırıw, turistlik xızmetlerdi diversifikaciyalaw hám sapasın jaqsılaw máselelerine ayrıqsha itibar qaratıldı. Nızam joybarların qabıllaw, parlament wákilleriniń pikirine kóre, Háreketler strategiyasın nátiyjeli ámelge asırıwǵa xızmet etedi.
Deputatlar ózleriniń jumısın Ministrler Kabineti tárepinen kirgizilgen «Ózbekstan Respublikası turaq-jay kommunallıq xızmet kórsetiw tarawı xızmetkerleri kúnin belgilew haqqında»ǵı nızam joybarın birinshi oqıwda kórip shıǵıwdan basladı.
Atap ótilgenindey, turaq-jay kommunallıq xızmet kórsetiw tarawında keń kólemli reformalar ámelge asırılıwı nátiyjesinde turaq-jay kommunallıq xızmetlerin kórsetiw, kóp kvartiralı turaq-jay qorınan paydalanıw, sonday-aq, jeke turaq-jay múlk iyeleri shirketleriniń qarjı-ekonomikalıq turaqlılıǵın arttırıw boyınsha nátiyjeli hám sapalı jańa sistema qáliplestirildi.
Házirgi waqıtta respublikada turaq-jay kommunallıq xızmet kórsetiw tarawında 157 mıńnan aslam jumısshı hám xızmetker jumıs islemekte. Joqarıda atap ótilgen pikirlerden kelip shıqqan halda, kommunallıq xızmet kórsetiw tarawınıń jumıs nátiyjeliligin bunnan bılay da artırrıw, sadıqlıq penen orınlanǵan miynetti xoshametlew maqsetinde nızam joybarında Turaq-jay kommunallıq xızmet kórsetiw ministrligi shólkemlestirgen kún-18-apreldi Turaq-jay kommunallıq xızmet kórsetiw tarawı xızmetkerleri kúni etip belgilew usınıs etilmekte.
Bunnan keyin deputatlar «Ulıwmajáhán pochta awqamınıń Ustavına Toǵızınshı qosımsha bayanlamanı (Stambul, 2016-jıl 6-oktyabr) ratifikaciyalaw haqqında»ǵı nızam joybarın birinshi oqıwda kórip shıqtı.
Ózbekstan 1994-jıldan berli Ulıwmajáhán pochta awqamınıń aǵzası bolıp esaplanadı, onıń jumısına belsene qatnasadı hám xalıqaralıq qatnasıqlardı rawajlandırıwǵa salmaqlı úles qospaqta. Ulıwmajáhán pochta awqamınıń Ustavı Ulıwmaxáhán pochta baylanısınıń tiykarǵı hújjeti bolıp esaplanadı. Kongress tárepinen usı Ustavqa ózgeris qabıl etilgende Qosımsha bayanlama dúziledi. Ulıwmajáhán pochta awqamınıń XXVI kongressinde qabıl etilgen Ulıwmajáhán pochta awqamınıń Ustavına tiyisli qosımsha bayanlamadan kelip shıǵatuǵın Ózbekstan Respublikasınıń huqıqların hám minnetlemelerin ámelge asırıw maqsetinde usı qosımsha bayanlamanı implementaciyalaw boyınsha mámleket ishinde tártip-qaǵıydalardı ótkeriw zárúr.
Nızam joybarınıń qabıl etiliwi elimizge Ulıwmajáhán pochta awqamınıń Ustavınan kelip shıǵatuǵın huqıqlar menen minnetlemelerdi ámelge asırıw, xalıqaralıq shólkemlerde óz máplerin qorǵaw imkaniyatın beredi. Bunnan tısqarı, Ulıwmajáhán pochta awqamına aǵza eller menen birge islesiwdi bunnan bılay da rawajlandırıwǵa, sonday-aq, jańa texnologiyalardı hám úlgilerdi qollanǵan halda sapalı, nátiyjeli hám qáwipsiz pochta baylanısı xızmetlerin turaqlı rawajlandırıwdı dawam etiwge xızmet etedi.
Sonday-aq, «Bilimlendiriw, ilim hám mádeniyat máseleleri boyınsha Islam shólkemi Ustavın (Baku, 2015-jıl 26-noyabr) ratifikaciyalaw haqqında»ǵı nızam joybarı da birinshi oqıwda kórip shıǵıldı.
Bul hújjettiń qabıl etiliwi, nızam shıǵarıwshılardıń pikirine bola, usı tarawlarda xalıqaralıq birge islesiwdi bunnan bılay da rawajlandırıwǵa, Ózbekstannıń mádeniy-gumanitarlıq tarawdaǵı jetiskenliklerin keńnen úgit-násiyatlawǵa, elimizdiń Islam dúnyasındaǵı ullı rolin sáwlelendiriwge, respublikamızdıń áyyemgi tariyxı hám mádeniy miyras menen tanıstırıwǵa xızmet etedi. Sonday-aq, Ustavtıń kúshke kiriwi menen Tashkent Islam universiteti janındaǵı ISESCO Arnawlı kafedrasınıń tolıq jumısı jolǵa qoyıladı.
Soń deputatlar Ózbekstan Respublikası Salıq kodeksiniń 356- statyasına kirgizilip atırǵan dúzetiwdi dodalawǵa kiristi. Xalıq deputatlarınıń atap ótiwinshe, kirgizilip atırǵan qosımsha elektron biznes infrastrukturasın engiziwdi hám turistlik xızmetlerdi onlayn-brontlastırıw hám turistlik ónimlerdi internet arqalı satıw boyınsha xızmet kórsetetuǵın turistlik xızmet subektleriniń sanın kóbeytiwdi xoshametlewge xızmet etedi.
Nızam joybarın ekinshi oqıwda normasına jetkeriw sheńberinde relakciyalıq dúzetiwler kirgizildi. Rossiya, Belarus hám Gruziya sıyaqlı shet el tájiriybesi qayta úyrenildi. Sonday-aq, parlament frakciyalarınıń usınısları esapqa alındı.
Olardıń pikirinshe, usı nızamnıń qabıl etiliwi bul tarawda kórsetilip atırǵan xızmetlerdiń sapasın hám tezligin arttırıwǵa, sonıń ishinde, málimleme kommunikaciya texnologiyaların belsene engiziw jolı arqalı arttırıwǵa, turistlik xızmetlerdiń bahasın azaytıwǵa, básekilikti rawajlandırıwǵa xızmet etedi.
Bunnan soń deputatlar «Ózbekstan Respublikasınıń Jınayat-processual kodeksine ózgerisler hám qosımshalar kirgiziw haqqında»ǵı nızam joybarın ekinshi oqıwda kórip shıǵıwǵa kiristi. Bul hújjet jınayat sudı islerin júrgiziwdi qatań túrde ózgertedi, sud procesine videokonferensbaylanıs sistemasın engiziw arqalı ádil sudlawdan paydalanıwdı keńeytedi.
Nızamshılıq hám sud-huqıq máseleleri komiteti janında Bas prokuratura, Joqarı sud wákillerinen, ekspertler hám qánigelerinen ibarat quramda dúzilgen jumısshı topar tárepinen elimizdiń ámeldegi nızam hújjetleri hám shet el tájiriybesi qayta úyrenildi. Ózbekstan Respublikasınıń jaqında qabıl etilgen Puqaralıq processual hám Ekonomikalıq processual kodeksleri qaǵıydaları esapqa alındı.
Xalıqaralıq ámeliyat sonı kórsetedi, videkonferensbaylanıstan jınayat sudı islerin júrgiziwde bunnan bılay da isenimli gúwalıq kórsetpelerin alıw hám erkinen ayırıw orınlarında bolǵan shaxstıń processte qatnasıwın támiyinlew maqsetinde paydalanıladı. Kirgizilip atırǵan dúzetiwler sud qorǵawına bolǵan huqıqtı ámelge asırıw ushın jáne de qolaylı sharayatlar jaratıw imkaniyatın beredi.
Deputatlar siyasiy partiyalar frakciyalarınıń pikirlerin inabatqa alǵan halda bul nızam joybarın qabıl etti. Májiliste parlamenttiń Nızamshılıq palatasınıń wákilliklerine tiyisli basqa da máseleler dodalandı.
Ózbekstan Respublikası
Oliy Majlisi Nızamshılıq palatasınıń
Málimleme xızmeti