Ózbekstan Respublikası Prezidenti Shavkat Mirziyoev Tájikstan Respublikası Prezidenti Imamali Rahmannıń mirát etiwine bola 2018-jıl 9-10-mart kúnleri mámleketlik sapar menen Tájikstanda boladı.
Joqarı dárejedegi sóylesiwlerde eki mámleket arasındaǵı siyasiy, sawda-ekonomikalıq, investiciyalıq, qarjılıq, transport-kommunikaciyalıq, turizm, mádeniy-gumanitar tarawlardaǵı hám aymaqlararalıq birge islesiwdi rawajlandırıw, puqaralardıń óz-ara sapar etiwin jeńilletiw máseleleri dodalanadı, táreplerdi qızıqtırǵan regionallıq hám xalıqaralıq mashqalalar boyınsha pikir alısıladı.
Sóylesiwlerdiń juwmaqları boyınsha Prezidentlerdiń Birliktegi bildiriwi, Ózbekstan – Tájikstan mámleketlik shegarasınıń ayrıqsha uchastkaları haqqında shártnama, Puqaralardıń óz-ara qatnawı haqqındaǵı kelisimge, sonday-aq, túrli tarawlarda birge islesiwdi rawajlandırıwǵa hám bekkemlewge qaratılǵan jámi 25 ten aslam hújjetke qol qoyılıwı rejelestirilgen.
Bunnan tısqarı, sapar sheńberinde ótkeriletuǵın biznes-forum hám Ózbekstan milliy kórkem óner kórgizbesinde kommerciyalıq shártnamalarǵa hám ekonomikanıń túrli tarmaqlarındaǵı kooperaciyaǵa baylanıslı kelisimlerge qol qoyılıwı názerde tutılǵan. Eki eldiń kórkem óner sheberleriniń qatnasıwında koncert shólkemlestiriliwi de mólsherlengen
Ózbekstan Respublikası Prezidenti
Baspasóz xızmeti