Ózbekstan Respublikası Prezidentiniń Qaraqalpaqstan Respublikasındaǵı Xalıq qabıllawxanası baslıǵı H.Xalimov, Qaraqalpaqstan Respublikası Ishki isler ministri A.Temirxanov, rayon hákimi A.Seytaxovlar tiyisli taraw basshıları menen birgelikte Nókis rayonı aymaǵındaǵı kem támiyinlengen hám baǵıwshısınan ayrılǵan shańaraqlardıń, jalǵız baslı nuranıylar menen imkaniyatı sheklengen puqaralardıń shańaraqlarında bolıp, olardıń múrájatların tıńlap, turmıs jaǵdayları menen tanıstı. Bul haqqında rayon hákimliginiń rásmiy veb-saytı xabar bermekte.
Kóshpeli qabıllaw barısında «Kerder» APJda jasawshı Qasımova Ziyada hám Dáwletyarova Gúlsaralar densawlıqların tiklewi ushın dári-darmaq satıp alıwǵa, jasaw úylerin ońlaw islerine hám jumıssız otırǵan hayal-qızları ushın jeńilletilgen kredit esabınan tigiw mashinasın alıwǵa járdem soradı.
Sonday-aq, «Baqanshaqlı» APJ turǵını Ataxanov Bahadır qızınıń emleniwine, jasap turǵan jayın hám úy qaptal móldek jerin óz atına hújjetlestirip beriliwine, «Qırantaw» APJ turǵını Jabbasova Sholpan qızlarına tigiw mashinasın alıwǵa hám awılınan gózzallıq salonın ashıwǵa ámeliy járdem beriwin sorap múrájat etti.
Úyreniw barısında kem támiyinlengen shańaraq aǵzalarınıń bántligin támiyinlew hám sociallıq turmıs dárejesin jaqsılaw ushın maqsetli jeńilletilgen kreditler, sonday-aq, balaları ushın napaqalar ajıratıw, jasap turǵan turaq jayların ońlaw boyınsha bildirilgen múrájatlar tiyisli tártipte dizimge alınıp, nızamlı túrde sheshiw boyınsha zárúrli tapsırmalar berildi.
Qaraqalpaqstan xabar agentligi