Búgingi kúnde elimizde xalqımızdıń salamatlıǵın saqlaw, eń shetki aymaqlardaǵı medicinalıq mákemelerdi de zamanagóy úskeneler menen támiyinlew máselesine ayrıqsha itibar qaratılmaqta.

Atap aytqanda, Ózbekstan Respublikası Prezidentiniń 2018-jıl 14-fevraldaǵı «Farmacevtika tarawın jedel rawajlandırıw boyınsha qosımsha ilajlar haqqında»ǵı qararı, bunnan basqa tarawdı rawajlandırıw boyınsha qabıl etilgen kóplegen nızamlar hám onıń orınlanıwı xalıqtıń medicina tarawına bolǵan talabı jolında xızmet etpekte.

Biraq soǵan qaramastan mámleket tárepinen belgilengen farmacevtikalıq ónimlerdiń hár qıylı bahalarda ekenligi bir qatar narazılılıqlardı keltirip shıǵarmaqta.

-Atap aytqanda, Qaraqalpaqstan Respublikası tutınıwshılardıń huqıqların qorǵaw jámiyetleri Federaciyasına puqaralardan 2017-jıl dawamında 967 múrájat kelip túsken bolsa, solardıń 15 i medicina tarawına baylanıslı múrájat bolıp esaplanadı,-deydi Federaciyanıń Málimleme hám xabar sektorınıń baslıǵı D.Dáwletbaeva.

Máselen, Nókis qalası tutınıwshılardıń huqıqların qorǵaw jámiyetine qalanıń Qızketken elatında jasawshı puqara D.Ájimuratovtan «Aziza» dárixanasında medicinalıq buyımlar (vata, shpric h.b) qımbat ekenligi boyınsha múrájat kelip túsedi.

Arza jámiyet qánigeleri tárepinen tiyisli tártipte úyrenip shıǵılıp, haqıyqatında da olarǵa ústeme baha qoyılıp satılıp atırǵanlıǵı anıqlandı. Tutınıwshınıń 8 mıń sumı qaytarıp berildi.

Sonday-aq, Nókis qalası «Qattıaǵar» MPJda jasawshı S.Saǵidullaev «Oraylıq bazar»da jaylasqan «Merwert farm» dárixanasınan 33 mıń 800 sumǵa «Kopera» mazın satıp alǵanlıǵın, biraq ol paydalanıwǵa jaramsız bolıp shıqqanlıǵı boyınsha aytıp narazılıǵın bildiredi.

Múrájat jámiyet qánigeleri tárepinen úyrenip shıǵılıp, tutınıwshınıń maz ushın jumsaǵan pulı qaytarıp berildi.

Qaraqalpaqstan xabar agentligi.