«Uz–Kor Gas Chemical» qospa kárxanası Xalıqaralıq hayal-qızlar kúnine arnap óz miynet jámááti hayal-qızlarına ájayıp sawǵa inam etti. Usı hápte dem alıs kúnleri qospa kárxana hayal-qızları Tashkent qalasına bayram saparına shıǵıp, gózzal paytaxtımızdıń kórnekli jerlerine sayaxat etedi.

Sayaxatshılardıń sapar dawamında Repressiya qurbanları muzeyine, Ámeliy kórkem-óner muzeyine, Kafal ál-Shashi, Minor, Namazgoh jáne Tilla-Sheyx meshitlerine, Házireti Imam (Xastimam) kompleksi menen Barakxana medresesine zıyarat etiwi, Mustaqillik maydanı menen Ámir Temur qıyabanına sayaxat etiwi rejelestirilgen. Bunnan tısqarı, jámáát Alisher Nawayı atındaǵı Tashkent opera hám balet teatrında spektaklge, «Istiqlol» kórkem óner sarayında Ózbekstan xalıq artisti Yulduz Usmanovanıń bayram koncertine baradı.

Qospa kárxana hayal-qızları ushın zamanagóy qolaylı avtobus, ekskursiya ushın gid, túnew ushın abıroylı oteller jáne paytaxtımızdıń eń jaqsı restoranları joqarı dárejede xızmet kórsetedi.

Bul ájayıp sapar aldınan Ústirt gaz-ximiya kompleksiniń ózinde hayal-qızlar ushın ilaj hám bayram dásturxanı shólkemlestiriledi.

Bul sayaxat hám shólkemlestirilip atırǵan ilajlar olardıń bayramın mazmunlı etip, umıtılmas tásirler baǵısh etetuǵını anıq.

Aytıp ótiw zárúr, «Uz-Kor Gas Chemical» qospa kárxanasında búgingi kúnde jetpisten aslam hayal-qızlar jumıs islemekte. Olar óndirislik processke ózleriniń salmaqlı úlesin qosıp, jámiyetlik jumıslarda da belsene qatnaspaqta. Qospa kárxana hayal qızlarınan metrolog Raya Dáwletnazarova elimiz ǵárezsizliginiń 25 jıllıǵı múnásibeti menen «Ózbekstan Respublikasına miyneti sińgen sanaat xızmetkeri» húrmetli ataǵına miyasar bolǵan edi. Qospa kárxana laborantı Talwas Jabbarbergenova óziniń qosıqları menen gazeta betlerinde shıǵıp, tanılıp kiyatırǵan shayır qız esaplanadı.

M.Igilikova.

Qaraqalpaqstan xabar agentligi