Paytaxtımızda puqaralardıń ózin-ózi basqarıw uyımları jumısların muwapıqlastırıw boyınsha Beruniy, Qońırat, Xojeli, Shımbay, Ellikqala rayonlıq Keńeslerine Prezident sawǵası – «Matiz» xızmet avtomashinalarınıń gilti saltanatlı túrde tapsırıldı.

Ózbekstan Respublikası Prezidentiniń 2017-jıl 3-fevraldaǵı «Máhálle institutın bunnan bılay da jetilistiriw ilajları haqqında»ǵı pármanı menen puqaralardıń ózin-ózi basqarıw uyımları jumısların muwapıqlastırıw boyınsha respublikalıq, qalalıq hám rayonlıq Keńesleri dúzilgen edi. Keńes dúziliwi menen puqaralar jıyınlarınıń materiallıq-texnikalıq bazası jaqsılanbaqta.

Ótken jılı 5 puqaralar jıyınlarınıń imaratları jańadan qurıldı, 32 sine rekonstrukciya hám iri ońlaw jumısları alıp barıldı, 25 ine kompyuter komplektleri, 63 ine mebel alıp berildi.

– Ótken jılı rayonımızda 6 adamnıń operaciya islenip emleniwine, 10 adamnıń jayına iri ońlaw jumısları ushın bir qatar járdemler kórsettik. Tiyisli shólkemler menen birge 150 adamǵa gaz plita, suwıtqısh sıyaqlı úy-ruzıgershilik buyımların sawǵa ettik. Bıyıl bolsa, bunday jumıslardıń kólemin ele de keńeytiw belgilengen, – deydi puqaralardıń ózin-ózi basqarıw uyımları jumısların muwapıqlastırıw boyınsha Xojeli rayonlıq Keńesi baslıǵınıń orınbasarı A.Turımbetov. – Bizge xızmet avtomashinalarınıń ajıratılıwı awırımızdı ádewir jenil etetuǵın boldı. Bunıń ushın Jurtbasshımızǵa sheksiz minnetdarmız.

Jaqın arada qalǵan rayonlarǵa da usınday avtomashinalar tapsırılıwı kútilmekte.

Ilajǵa Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev qatnastı.

Qaraqalpaqstan xabar agentligi