Tashkentte 5-mart kúni Ózbekstan-Rossiya ministrlikleraralıq sóylesiw sheńberinde jumısshı toparlardıń ushırasıwları bolıp ótti.
2017-jılı Ózbekstan hám Rossiya Federaciyasınıń birge islesiwi jańa basqıshqa kóterildi. Eki el basshıları arasındaǵı doslıq qatnasıqlar ministrlikler hám vedomstvolararalıq birge islesiwdiń tez pát penen rawajlanıwın támiyinlewde áhmiyetli faktor bolmaqta.
Prezident Shavkat Mirziyoevtiń 2017-jıl 4-5-aprel kúnleri Rossiya Federaciyasına mámleketlik saparı sheńberinde qarjı ministrlikleri arasındaǵı birge islesiw haqqında memorandumǵa qol qoyılǵan bolıp, oǵan muwapıq salıq siyasatı, salıq hákimshiligi hám jergilikli byudjetlerdiń biyǵárezligin arttırıwda birge islesiwdi bekkemlew názerde tutılǵan.
Memorandumnıń orınlanıwı sheńberinde salıq hám qarjı uyımlarınıń tájiriybesin úyreniw boyınsha óz-ara saparlar ámelge asırılmaqta, turaqlı túrde videokonferenciyalar ótkerilip kelinbekte.
Ózbekstan hám Rossiya qarjı ministrlikleri arasındaǵı kelisimlerdiń ámeliy orınlanıwı sheńberinde elimizge Rossiya Federaciyasınıń tiyisli ministrlikleri hám vedomstvoları wákillerinen ibarat delegaciyası keldi.
Ushırasıwlarda Ózbekstan Respublikasınıń Prezidenti janındaǵı Joybarlaw basqarması milliy agentligi, Qarjı ministrligi, Mámleketlik salıq hám Mámleketlik bajıxana komitetleriniń wákilleri, biyǵárez ekspertler qatnastı.
Qánigeler arasındaǵı sóylesiw bir neshe baǵdar boyınsha shólkemlestirildi. Atap aytqanda, Rossiyanıń salıqqa tartıw hám bajıxana nızamshılıǵı tarawındaǵı tájiriybesi, eki ministrliktiń óz-ara máplerine baylanıslı basqa da baǵdarlar boyınsha jumısshı toparlar dúzildi.
Tárepler eki eldegi milliy ekonomikanıń jaǵdayı haqqında maǵlıwmat almasıp, Rossiya-Ózbekstan qatnasıqlarınıń rawajlanıwı hám qarjı tarawındaǵı óz-ara sheriklik principlerin belgilep aldı.
Ilajda qatnasıwshılar tárepinen nátiyjeli birge islesiwdiń perspiktivadaǵı baǵdarları hár tárepleme dodalanıp, birge islesiwdi bunnan bılay da keńeytiw boyınsha óz-ara máplerge tiykarlanǵan «jol kartası» islep shıǵıldı. Onda názerde tutılǵan ilajlardıń orınlanıwı qarjı ministrlikleri arasındaǵı óz-ara tıǵız hám konstruktiv birge islesiwdi támiyinleydi.
Eki el qarjı ministrliginiń 6-mart kúni bolıp ótetuǵın ushırasıwında usı «jol kartası»na qol qoyıw rejelestirilgen.
ÓzA