Foto: Yusup Kamalov ózi jasaǵan deltaplan arqalı párwaz etpekte

66 jastaǵı qaraqalpaqstanlı oylap tabıwshı-ilimpaz Yusup Kamalov deltaplan arqalı elimiz boylap hawada sayaxat etiwdi usınıs etpekte. Ilimpaz, ásirese, Aral teńizi aymaǵındaǵı ájayıp kórinislerdi, Ústirttegi jebe tárizli súwretlerdi deltaplan arqalı tamashalaw maqsetke muwapıq, degen pikirde.

Yusup Kamalovtıń ózi deltaplan arqalı sayaxat etiwdi is júzinde ámelge asırıw múmkin ekenligin dálilledi. Onıń pikirinshe, ekstremal tásirlerden qárejetti ayamaytuǵın insanlar Moynaqtan deltaplanda ushıp, Araldı joqarıdan tamashalawı hám Ústirttiń ústi menen qaytıwı múmkin. Maǵlıwmatlarǵa qaraǵanda, motorlı deltaplanda eki turist biymálel 200-300 kilometr aralıqqa shekem ushıp barıp, qayta aladı.

Al, Shılpıq, «Nazarxan» awıl puqaralar jıyınındaǵı Bestóbe sıyaqlı aymaqlarda bolsa, motorsız deltaplannan da paydalanıwǵa boladı. Yaǵnıy, biyiklikten sekirip, hawada qalqıp turıw járdeminde azı-kem aspanda párwaz etiw de múmkin.

Yu.Kamalov Ózbekistan Ilimler Akademiyası Qaraqalpaqstan bóliminde isleydi. Ilimiy baǵdarı samal energetikasına qánigelesken. Sonıń menen birge, Aral teńizin hám Ámiwdáryanı qorǵaw Awqamınıń baslıǵı sıpatında aymaqtaǵı ekologiyalıq mashqalalar menen shuǵıllanadı. Yu.Kamalov ózi islep shıqqan 2 deltaplanında respublikamızdıń átirapların kórip shıǵadı, atmosferadaǵı hawa aǵımlarınıń ózgesheligin úyrenedi.

Yu.Kamalov: Ústirttegi usınday jebe tárizli súwretlerdi deltaplan arqalı tamashalaw múmkin

– Bunnan 40 jıl burın ilimiy izertlewler ushın 2 deltaplan soǵıp, ushıwdı úyrendim. Keyin ala jáne ekewin satıp aldım. Házirgi waqıtta samal menen háreketlenetuǵın transport, vindsyorfing islep shıǵarıw ústinde izlenip atırman, – deydi Yusup Kamalov.

Ekstremal sport penen shuǵıllanıw, atap aytqanda, deltaplanda ushıw ushın bizlerde tolıq imkaniyatlar hám sharayatlar bar. Aral teńiziniń ústinen ushıp barıp, onıń ájayıp kórinisin tamashalaw usınday sport ıshqıpazları ushın oǵada zawıqlı bolar edi.

Bul óz gezeginde elimizde turizmniń rawajlanıwına úles qosqan bolar edi.

M.PIRNAZAROVA,

Qaraqalpaqstan xabar agentliginiń xabarshısı.