Usı jıldıń 27-fevral hám 4-mart kúnleri aralıǵında Qırǵızstan Respublikasınıń Bishkek qalasında erkin gúres boyınsha erler hám hayal-qızlar arasında Aziya chempionatı ótkerildi.

Chempionatta Ózbekstan saylandı komandası quramındaǵı sportshılar 4 altın, 5 gúmis hám 6 qola medalların qolǵa kirgizdi.


Olardıń ishinde jerlesimiz – respublikalıq jeke gúres túrleri boyınsha qánigelestirilgen balalar hám jas óspirimler sport mektebiniń tárbiyalanıwshısı Nabira Esenbaeva da bar bolıp, hayal-qızlar arasında 59 kilogramm salmaq kategoriyasındaǵı bellesiwde gúmis medal jeńimpazı boldı.

Chempionat juwmaǵında Ózbekstan saylandı komandası ulıwmakomandalıq esapta 3-orındı iyeledi.

Nabira Esenbaeva 1998-jılı Nókis qalasında tuwılǵan. Sporttıń jeke gúres túri menen 8 jıldan berli turaqlı shuǵıllanıp kelmekte. Ol bir neshe márte Ózbekstan hám Qaraqalpaqstan chempionı. Xalıqaralıq jarıslardıń sıylı orın jeńimpazı.

Házirde N.Esenbaeva Ázerbayjan Respublikasında Aziya oyınlarına tayarlıq kóriw boyınsha oqıw-shınıǵıw jıyınına qatnaspaqta.

Sportshınıń joqarı jetiskenliklerge erisiwinde onıń treneri Bahadır Qálimbetovtıń úlesi mol.

Tárbiya SEYTNAZAROVA,

Qaraqalpaqstan xabar agentligi xabarshısı