Usı jıldıń 22-fevral hám 5-mart kúnleri aralıǵında Birlesken Arab Ámirliginiń Dubay qalasında sporttıń qılıshlasıw túri boyınsha kadetler hám jas óspirimler arasında ótkerilgen Aziya chempionatında qaraqalpalpaqstanlı sportshılar da múnásip qatnasıp, gúmis hám bronza medallar jeńimpazı boldı hám sonıń menen birge jeńimpazlar «Spark» avtomashinası menen sıylıqlandı.
Dúnyanıń 15 mámleketinen sportshılar qatnasqan bul jarısta jerleslerimiz – Nókis qalalıq melioraciya hám suw xojalıǵı kolledjiniń oqıwshısı Sherzod Mamutov hám 2-sanlı qánigelestirilgen mekteptiń oqıwshısı Pazıl Genjebaevlar ekinshi orındı iyelegen bolsa, Nókis Olimpiada rezervleri kolledjiniń oqıwshısı Zaynab Dayıbekovaǵa úshinshi orın nesiyp etti.
Islam Kárimov atındaǵı Tashkent xalıqaralıq aeroportında Ózbekstan saylandı komandası aǵzaların kútip alıw máresiminde xalıqaralıq abıroylı turnirde erisken jetiskenlikleri ushın sportshılar hám olardıń trenerleri Qılıshlasıw federaciyası tárepinen sıylıqlandı. Qaraqalpaqstannan qatnasqan 3 sportshı hám 1 trenerge jámi 4 «Spark» avtomashinalarınıń gilti saltanatlı túrde tapsırıldı.
Sporttıń qılıshpazlıq túriniń respublikamızǵa kirip kelgenine onsha kóp waqıt bolmasa da bul sport túri menen shuǵıllanıwshı jaslarımız arasınan qábiletli sportshılardıń jetilisip shıǵıp atırǵanlıǵı quwanarlı jaǵday. Elimizde sportqa bolǵan itibar nátiyjesinde sportshı jaslarımız joqarı jetiskenliklerge erisip atır, – deydi sportshılardıń treneri Dáwirbek Jiemuratov. Sportshılarımız ele de xalqımızdıń isenimin aqlawına isenim bildirip qalaman.
Esletip ótemiz, 2017-jıldıń dekabr ayında Prezidentimiz Qaraqalpaqstanǵa saparı dawamında jas sportshılardı erisip atırǵan joqarı nátiyjeleri menen qutlıqlap, qılıshpazlıq boyınsha xalıqaralıq turnirler jeńimpazı Zaynab Dayıbekovaǵa “Nexia” avtomobilin sawǵa etken edi. Solay etip, Zaynabta endi “Nexia” hám «Spark» avtomobilleri bar.
Tárbiya SEYTNAZAROVA,
Qaraqalpaqstan xabar agentligi xabarshısı