Usı jıldıń 6-17-fevral kúnleri aralıǵında Tashkent qalasında 14, 16 hám 18 jasqa shekemgi er hám qız balalar arasında shaxmat boyınsha Ózbekstan Respublikası chempionatı ótkerildi.
Oǵan respublikamızdıń barlıq wálayatlarınan kelgen jas shaxmatshılar qatnasıp, standart, blic hám rapid jónelisleri boyınsha óz-ara kúsh sınastı.
Chempionatqa Qaraqalpaqstan saylandı komandası quramında qatnasqan sportshılar arasınan jerlesimiz, taqıyataslı Maxım Orazmuhammedova rapid jónelisi boyınsha altın medaldı jeńip alǵan bolsa, standart jónelisi boyınsha gúmis medal menen sıylıqlandı.
– Shákirtim 4 jasınan baslap shaxmat dógeregine qatnay basladı. 5 jasında 10 jastaǵılar arasında ótkerilgen jarısta Qaraqalpaqstan chempionı boldı. 4 márte Ózbekstan chempionatına qatnasıp, sıylı orındı iyeledi. Hayal-qızlar arasında birinshi márte Qaraqalpaqstan chempionı boldı. Ótken jılı Aziya chempionatına qatnasıp 2-orındı iyeledi, – deydi sportshınıń treneri Ábdikárim Turaev. Bul jeńisi nátiyjesinde M.Orazmuhammedova usı jıldıń 31-mart hám 10-aprel kúnleri aralıǵında Tayland mámleketiniń Chiangmay qalasında bolıp ótetuǵın Aziya chempionatına qatnasıw ushın jollamanı qolǵa kirgizdi.
Tárbiya SEYTNAZAROVA,
Qaraqalpaqstan xabar agentligi xabarshısı.