Ózbekstan Respublikası Qorǵanıw ministrliginiń Ruwxıylıq hám aǵartıwshılıq orayı janında birinshi márte áskeriy teatr-studiyası – “Turan” shólkemlestirildi. Bul haqqında Qorǵanıw ministrliginiń baspasóz xızmeti xabar bermekte.
Maǵlıwmatlarǵa qaraǵanda, bul teatr-studiya tek ǵana áskeriy xızmetkerler menen olardıń shańaraq aǵzalarına xızmet etip qoymastan, barlıq puqaralar ushın tamashalar shólkemlestiredi. Onıń quramında Ózbekstanǵa xızmet kórsetken hám birneshe jıllardan berli tamashagóylerdiń kewlinen shıǵıp kiyatırǵan tájiriybeli aktyor hám aktrisalar bar.
“Turan” teatrı óziniń dáslepki premerasın 8-marttan keyin “Jalaladdin Manguberdi” atamasındaǵı spektaklinen baslawdı rejelestirmekte. Sonday-aq, teatr repertuarınan “Biybixanım”, “Tumaris”, “Bir kúnlik baxıt” atamasındaǵı spektakller de orın alǵan.
Maǵlıwmatlarǵa qaraǵanda, bul teatr-studiyası usı jıldıń 28-may hám 2-iyun kúnleri aralıǵında Arqa-batıs áskeriy okrugi, yaǵnıy Qaraqalpaqstan Respublikası hám Xorezm wálayatına gastrol saparına shıǵıwdı rejelestirmekte.
Islam Matekov,
Qaraqalpaqstan xabar agentliginiń sholıwshısı.