Qaraqalpaqstan Respublikası Mádeniyat ministrligine qaraslı Respublikalıq kózi ázziler kitapxanasınıń direktorı Alima Axetova kitapxananıń Nókis qalası, Tórtkúl, Elliqala, Kegeyli rayonlarında filialları ashılatuǵınlıǵı haqqında xabar berdi.
Kitapxanalar rayon oraylarında jaylasqan mádeniyat hám xalıqtıń dem alıw orayları imaratı ishinen ashılıwı rejelestirilmekte.
Bunday filiallardı shólkemlestiriwdegi tiykarǵı maqset – kózi ázzi insanlardıń hám olardıń shańaraq aǵzalarınıń bilim alıw dárejesin arttırıw, kitapxana jumısın kúsheytiw, kitapxana fondı, oqıw-metodikalıq, kórkem-ádebiy, materiallıq hám texnikalıq bazasın bekkemlew, shtatlar birliginde kórsetilgen tájiriybeli qánigeler menen támiyinlew jumısların ámelge asırıwdan ibarat.
Kitapxanalardı 2000 dana sóylewshi, tegis baspalı hám L.Brayl shriftindegi ádebiyatlar menen támiyinlew kútilmekte.
Maǵlıwmat ornında aytıp ótetuǵın bolsaq, bunday kitapxana filialları burın Shımbay, Xojeli, Ámiwdárya, Qońırat, Beruniy rayonlarında ashılǵan bolıp, endi olardıń qatarına 1 qala hám 3 rayon qosılatuǵın boldı.
Ótken jılǵı kórsetkishlerge súyenetuǵın bolsaq, Nókis qalasında 996, Tórtkúl rayonında 490, Ellikqala rayonında 332, Kegeyli rayonında 253 hár túrli topardaǵı kózi ázziler esapqa alınǵan.
Tárbiya SEYTNAZAROVA,
Qaraqalpaqstan xabar agentligi xabarshısı