Ájiniyaz atındaǵı Nókis mámleketlik pedagogikalıq institutınıń Qaraqalpaq ádebiyatı kafedrasınıń shólkemlestiriwinde usı jıl 22-28-fevral kúnleri «Sulayman Baqırǵanıydıń ómiri hám dóretiwshiligin úzliksiz bilimlendiriw sistemasında úyreniwdiń áhmiyetli máseleleri» temasında respublikalıq ilimiy-teoriyalıq konferenciya bolıp ótti.

Konferenciyanı NMPIdiń ilimiy isler boyınsha prorektorı M.Jalelov alıp bardı.

Onda Ózbekstan Respublikası Ilimler Akademiyası akademigi J.Bazarbaev, Ózbekstan Qaharmanı, arxeolog Ǵ.Xojaniyazov, filologiya ilimleriniń doktorı, professor K.Allambergenov, Qońırat rayonınan veteran ustaz Ó.Embergenov hám basqalar shıǵıp sóylep, Sulayman Baqırǵanıydıń miyrasları – ulıwma insanıylıq qádiriyat ekenligin ayrıqsha atap ótti.

Ilaj NMPIdiń Málimleme-resurs orayında shólkemlestirilgen Sulayman Baqırǵanıydıń ómiri hám dóretiwshiligine baylanıslı kitaplar kórgizbesi menen baslanıp, instituttıń barlıq fakultetlerinde ádebiy sáwbetler hám kórkem oqıwlar ótkerildi. Sonday-aq, barlıq fakultetlerde «Sulayman Baqırǵanıy shıǵarmalarınıń bilimdanı» atamasındaǵı tapqırlıq, ziyreklik jarısları hám basqa da ádebiy-kórkem nominaciyalar boyınsha tańlawlar shólkemlestirildi.

25-fevral kúni ilaj qatnasıwshıları Qońırat hám Moynaq rayonı aymaqlarındaǵı Hákim Ata Sulayman Baqırǵanıy mavzoleyin, eski Buǵraxan qalası arxeologiyalıq kompleksin zıyaratladı. Usı rayonlardaǵı oqıw orınlarında oqıwshılar menen ádebiy keshe hám ushırasıwlar ótkerildi. Sonday-aq, túrkiy filologiya qánigeleriniń dógerek sáwbetlesiwleri, instituttıń social-gumanitar baǵdarlarında bilim beretuǵın fakultetlerde Sulayman Baqırǵanıydıń ómiri, dóretiwshiligi, onıń zamanı, filosofiyası boyınsha ashıq sabaqlar ótkerildi.

– Endigi jıldan baslap barlıq ulıwma bilim beriw mektepleriniń 10-11-klasslarında, joqarı oqıw orınlarınıń qaraqalpaq tili hám ádebiyatı fakultetlerinde Sulayman Baqırǵanıydıń ómiri hám dóretiwshiligine baylanıslı temalarda sabaqlar ótilip baslaydı. Házirgi waqıtta bul ushın sabaqlıqlar tayarlanbaqta, kitaplar baspadan shıqpaqta,-deydi professor K.Allambergenov.

Sekciya májilislerinde Hákim Ata Sulayman Baqırǵanıy zamanındaǵı etnomádeniyat, onıń mádeniy miyrasınıń izertleniw jaǵdayları, shıǵarmalarınıń tariyxıy dárek sıpatındaǵı áhmiyeti, ilimniń rawajlanıwındaǵı roli sıyaqlı bir qatar máseleler boyınsha onlaǵan ilimiy bayanatlar tıńlanıp, pikir-usınıslar bildirildi.

Bul ilajlar Ózbekstan Respublikası Ministrler Kabinetiniń 2017-jıl 17-yanvardaǵı «Qaraqalpaqstan Respublikası aymaqların sociallıq-ekonomikalıq rawajlandırıw, xalıqtıń turmıs dárejesin jáne de jaqsılaw boyınsha rejeler baǵdarlaması haqqında»ǵı qararı tiykarında ótkerilmekte.

Maǵlıwmat ushın, el arasında Hákim Ata laqabı menen belgili bolǵan ullı suwfıy hám shayır Sulayman Baqırǵanıy biziń jerlesimiz bolıp tabıladı. Ol shama menen 1122-1123-jılları tuwılǵan, 1186-jılı Qońıratqa jaqın jerdegi Baqırǵan awılında qaytıs bolǵan.

Sulayman Baqırǵanıy túrkiy xalıqlardıń arasında sufizm poziciyasın baslap bergen Xoja Ahmad Yassawiydiń shákirti – ustazınıń jolın quwıp, islam dini hám tásawwıf isenimlerin qarapayım xalıqqa tereń túsindirip beretuǵın qosıqlardı hám dástanlardı dóretken.

Á.Jiemuratov,

Qaraqalpaqstan xabar agentliginiń xabarshısı.