«…Mektepke birinshi klassqa qádem qoyǵanımda mektebimiz qulayın dep tur edi. Soń ol buzıldı hám bizler birewdiń úyinde oqıp júrdik. Úydiń iyesi kerek emes bólmesin bizlerge ajıratıp berdi. Ol úy ızǵar jerde jaylasqanlıqtan, búrge kóp edi, talanatuǵın edik. Úydiń polı da tesik-tesik bolıp, hátte talay ruchkalarım sol tesikke túsip ketti. Keyin onı remontladı. Soǵan shekem bizler garajında oqıp turdıq. Bir kúni kishkene qız sol jerde oynap júrgende ústine dárwaza qulap ketti, qız astında qalıp, qaytıs boldı.
Úshinshi klassta muǵallimimniń úyinde bilim ala basladıq. Biz oqıwshılar barı-joǵı 1-2-3-4-klasslar qosılıp, on tórt oqıwshı edik. Muǵallim úyinen eki bólmesin ajıratıp berdi. Bólmelerde awqatlanatuǵın stollarda oqıǵanımız sebepli jeńimizden shıǵanaǵımızǵa deyin shire bolıp qalatuǵın edi. Sol waqıtları men qashan mekteptiń partasında otırıp oqır ekenmen, qashan doskaǵa jazıw jazadı ekenmen, dep árman eter edim…»
Bul XIX ásirde jazılǵan shıǵarmadan úzindiler yamasa bazıbir qalaq mámleketlerdegi ayanıshlı turmıstan kórinisler dep oylasańız, qátelesesiz. Bular respublikamızdıń Nókis rayonı «Shúyit awıl»ında jasap kiyatırǵan 6-klass oqıwshısınıń basınan keshirgenleri.
Júdá sawatlılıq penen eki bet aq qaǵazǵa usı hám basqa da kewil keshirmelerin túsirgen oqıwshı bilim alıwǵa degen kúshli intası sebepli barlıq qıyınshılıqlardı jeńip, házirgi waqıtta I.Yusupov atındaǵı intalı balalar mektep-internatında tálim-tárbiya almaqta.
Usı orında mámleketimizde májbúriy bilimlendiriw baǵdarındaǵı ámelge asırılıp atırǵan reformalardıń ámeliy nátiyjesi bul awılǵa qalay jetip barmaǵanına túsiniw qıyın.
«Shúyit awıl»ǵa bunnan basqa mektep (15-sanlı ulıwma bilim beriw mektebi) 8 kilometr qashıqlıqta jaylasqan. Bunnan tórt-bes jıl burın awıldaǵı mektep filialınıń góne imaratı buzıp taslanǵannan keyin ayırım balalar kúnniń ıssı-suwıǵında usı mektepke qatnay baslaǵan, shaması kelmegenler muǵallimlerdiń úyinde oqıp júrgen.
Nókis rayonındaǵı «Qurbaniyaz Nurniyaz» fermer xojalıǵı baslıǵı Sholpan Qurbanazarova xojalıqtıń jıllıq tabısı esabınan buzılǵan mektep filialın qayta tiklewge qáwenderlik etti. Onıń eki jıllıq háreketinen soń úsh xanalı imarat boy tikleydi. Shańaraǵındaǵı ayırım sebeplerge bola, mektep tolıq ońlanbay qaladı.
– Oqıwshılardıń derlik hár kúni aldımnan shıǵıp «bizge Húkimet mektep salıp bersin da, siz barıp aytıń» dep qıyılıp soray bergeninen eljirep, qayırqomlıq etiwge qarar ettim, – deydi fermer Sh.Qurbanazarova. – Mektepti tolıq pitkeriwge shamam jetpedi. Rayonımız hákimi hám prokurorınıń járdemi menen qalǵan jaqları tolıq pitkerildi. Nátiyjede 2017-jılı 25-dekabrde filialdıń ashılıw máresimi bolıp ótti. Házir mektep zamanagóy kóriniske kirdi. Balalardıń júrekleri sháwkildesip, «túsimiz emes pe?» dep qoyadı. Olar Húkimet basshılarınan kútá minnetdar.
Házir «Shúyit awıl» oqıwshıları awılda qurılǵan zamanagóy mektep filialında mámleketlik bilimlendiriw standartlarına sáykes sharayatta bilim almaqta.
M.PIRNAZAROVA,
Qaraqalpaqstan xabar agentliginiń xabarshısı.