Burın xabar etilgenindey, «UZDIGITAL TV» kompaniyası sırt ellerdiń telekanalların ashıq túrde efirge uzatpaqta. Fevral ayınıń basında bul telekanallar úsh túrli tarif tiykarında pullı rejimge ótedi.
Jaqında paytaxtımızda «UZDIGITAL TV» juwapkershiligi sheklengen jámiyetiniń úlken kólemdegi sawda hám abonentlerge xızmet kórsetiw ofisiniń ashılıwı rejelestirilgen.
Ofis qarıydardıń televizorı DVB-T2 standarttaǵı (ishki) tyunerge iye yamasa iye emesligine qarap, 2 túrdegi qurılmanı (tele-cardtı yamasa tyunerdi) usınadı. Sırt ellerdiń 4, 13, 31 telekanalı kórsetetuǵın úsh túrli tarif tiykarında aylıq tólemler 4 yarım mıń sum, 11 mıń sum, 16 mıń 500 sum etip belgilengen.
– Házirgi kúnde Qaraqalpaqstan Respublikasında tólemli sanlı televidenieni jolǵa qoyıw ilajları alıp barılmaqta. Efirge sırt ellerdiń telekanalların uzatıw usı ilajlardıń baslaması edi. Maqset – «UZDIGITAL TV» sanlı televideniesiniń joqarı anıqlıqta hám sapalı kóriniste islewin ayqın kórsetip beriw, – deydi jámiyettiń marketing boyınsha menedjeri Babur Qabiljanov. – Mobil baylanıs qurallarına arnalǵan programmamızdıń járdeminde paydalanıwshı úyinde otırıp, telekanallardı kóriw ushın aylıq tólemlerdi tólewi múmkin. Elektron kórsetiwler baǵdarlaması (EPG)nıń yadqa salıw funkciyasınan paydalanıp, unatqan kórsetiwin ótkerip jibermew imkaniyatına iye boladı. Sonday-aq, qurılmalarda ata-analar qadaǵalawı ornatılǵan bolıp, 16 jastan kishi balalar kóriwge bolmaytuǵın kórsetiwlerdi hám filmlerdi parol qoyıw arqalı bloklap taslaw múmkin. Olardı tek rásmiy ofislerden ǵana satıp alıwdı usınıs etemiz.
Eskertip ótemiz, bul telekanallar Nókis qalası hám onnan 70 kilometr qashıqlıqtaǵı aymaqlarda ǵana kórsetedi.
Qaraqalpaqstan xabar agentligi