Beruniy rayonı hákimliginde «Ózbekstanda ashshı burısh jetistiriwdiń keleshegi» baǵdarlaması sheńberinde ámeliy oqıw-seminarı bolıp ótti. Onda atap ótilgenindey, bıyılǵı jılı respublikamızda 4493 fermer xojalıǵında 7000 gektarǵa ashshı burısh egiw rejelestirilgen. Házirgi waqıtta bul egindi egiw boyınsha keń kólemde tayarlıq jumısları alıp barılmaqta.

Ózbekstan Respublikası Awıl hám suw xojalıǵı ministrligi, Tashkent mámleketlik agrar universiteti, Birlesken Milletler Shólkeminiń azıq-awqat hám awıl xojalıǵı shólkemi (FAO) tárepinen shólkemlestirilgen ilajǵa rayonlıq awıl hám suw xojalıǵı bólimleriniń, fermer, diyqan xojalıqları hám qıytaq jer iyeleri keńesleriniń basshıları menen qánigeleri, fermerler qatnastı.

Seminarda Ovosh, palız eginleri hám kartoshka jetistiriw ilimiy-izertlew institutınıń direktorı R.Hákimov, Dúnya júzilik palız jetistiriw orayınıń Orta Aziya hám Qubla Kavkaz boyınsha regionallıq wákilxanasınıń baslıǵı R.Mavlyanova, Birlesken Milletler Shólkeminiń azıq-awqat hám awıl xojalıǵı shólkeminiń Ózbekstandaǵı wákilxanasınıń joybar koordinatorı A.Nurbekov, Koreya shólkeminiń Ózbekstandaǵı orayınıń direktorı An Xi Sung, Tashkent mámleketlik agrar universitetiniń docenti A.Azimovlar shıǵıp sóylep, dúnya júzinde ashshı burısh jetistiriwdiń búgingi jaǵdayı, bul baǵdarda Qubla Koreya mámleketiniń tájiriybesi keń túrde sóz etildi. Sonday-aq, bul eginniń sortları hám texnologiyası, onı qıytaq jerlerde egiw agrotexnikası, jetistirilgen ónimlerdi innovaciyalıq texnologiyalar tiykarında keptiriw hám onı qayta islew boyınsha keń túrde túsinik berildi.

Ilaj qatnasıwshıları ózlerin qızıqtırǵan sorawlarǵa juwap aldı.

Qaraqalpaqstan xabar agentligi.