Qubla Koreya ózbekstanlı miynet migrantların qabıl etiw ushın kvotalar sanın kóbeytiwi múmkin. Bul boyınsha sóylesiwler házirde Koreyada saparda bolıp turǵan Bántlik hám miynet qatnasıqları ministrliginiń delegaciyaları tárepinen ótkerilmekte, dep xabar bermekte Sırtqı migraciya máseleleri agentliginiń saytı.

Házirgi waqıtta mámleketler arasındaǵı qatnasıqlarda nızamsız migraciya mashqalası orın almaqta. Ayrım ekspertlerdiń pikirinshe, Koreyada Ózbekstannan kelgen bir neshe on mıńlaǵan miynet migrantları nızamsız túrde jumıs islep atırǵan bolıwı múmkin.

Sonıń menen birge, 2007-jıldan 2016-jılǵa shekem 27 mıń ózbekstanlı Qubla Koreyada nızamlı túrde jumıs islew huqıqın qolǵa kirgizgen.

Bul jaǵdaydı tártipke salıw ushın migrantlardı qabıl etiw kvotasın kóbeytiw, sonday-aq, Koreya ekonomikasınıń basqa tarawlarına da tartıw rejelestirilmekte.

Jaqın kúnlerde Qubla Koreyanıń Kvanju qalasında ashılıwı názerde tutılǵan Ózbekstan sırtqı miynet migraciyası máseleleri boyınsha agentligi usı proceste járdem beriwi kútilmekte.

Sonday-aq, Ózbekstan delegaciyası tájiriybeli kadrlardı tayarlaw tarawında óz ara birge islesiwdi jolǵa qoyıw máselelerin dodalamaqta.

Bunıń ushın Ózbekstanda Qubla Koreyaǵa oqıw hám miynet etiw ushın ketiwge tayın bolǵan puqaralardı tayarlaytuǵın oqıw orayların ashıw rejelestirilmekte.

QXA