Yaponiya húkimeti Ózbekstan Respublikasındaǵı ulıwma bilim beriw mekteplerin kishi kólemdegi joybarlar tiykarında biyminnet ásbap-úskeneler hám inventarlar menen támiyinlew joybarı tiykarında Qaraqalpaqstanda eki mektepti, yaǵnıy Shımbay rayonındaǵı 38-sanlı, Nókis qalasındaǵı 2-sanlı mekteplerdiń ximiya, biologiya jáne fizika laboratoriyaların, kompyuter klasslardı, inglis tili xanaların eń zamanagóy ásbap-úskeneler, inventarlar menen biyminnet túrde támiyinleytuǵın boldı.
Bul haqqında Qaraqalpaqstan Respublikası Xalıq bilimlendiriw miinistrligi xabar bermekte.
Shımbay rayonı «Jipek jolı» mákan puqaralar jıyını aymaǵında jaylasqan 38-sanlı mektep eki oqıw imaratı hám ustaxanadan ibarat bolıp, 939 oqıwshı ornına mólsherlengen.
Mekteptiń birinshi imaratı 1973-jılı, ekinshi imaratı 1991-jılı paydalanıwǵa tapsırılǵan. Mektep 12×24 metr ólshemdegi sport zalına, májilisler zalına, asxana hám ustaxanaǵa iye. 2007-jılı rekonstrukciyalanǵan bolıp, házirgi waqıtta 155 oqıtıwshı rus hám qaraqalpaq tillerinde bilim berip kelmekte.
Nókis qalasındaǵı 2-sanlı ulıwma orta bilim beriw mektebi 1970-jılı paydalanıwǵa tapsırılǵan. 4 etajlı mektep 960 oqıwshıǵa mólsherlengen. 2007-jılı rekonstrukciyadan shıqqan mektepte 89 oqıtıwshı qaraqalpaq, rus hám qazaq tillerinde sabaq beredi.
Yaponiya húkimetiniń kótergen intası tiykarında Yaponiya mámleketiniń Ózbekstan Respublikasındaǵı elshixanasınıń ekinshi sekretarı Makoto Xoriguchi hám usı mámlekettiń elimizde kishi kólemdegi joybarlardı ámelge asırıw boyınsha koordinatorı Kuriya Cutaki usı eki mektepte boldı hám ásbap-úskeneler menen támiyinleniw jaǵdayın úyrendi.
Qaraqalpaqstan xabar agentligi.