Ózbekstan Respublikası Prezidenti Shavkat Mirziyoevqa Amerika Qurama Shtatları Prezidentinen usı jıl 26-27-mart kúnleri Tashkent qalasında bolıp ótetuǵın Awǵanstan boyınsha xalıqaralıq konferenciyaǵa baylanıslı xat keldi.
AQSh Prezidenti Ózbekstan Prezidentiniń Tashkentte bolıp ótetuǵın Awǵanstan boyınsha xalıqaralıq konferenciya sıpatlaması bayan etilgen xattı alǵanınan kewli tolǵanın atap ótti.
Xatta AQShtıń Qubla Aziyadaǵı strategiyası region ellerin Awǵanstandaǵı kelispewshiliklerdi tártipke salıw hám jaǵdaydı turaqlastırıw ushın birdey juwapkershilikti seziniwge shaqıratuǵını atap ótilgen.
Donald Tramp Ózbekstan Prezidentiniń regionallıq kózqarasına baylanıslı baslamasın qollap-quwatlaytuǵının, bul bolsa óz gezeginde jaǵdaydı tınısh kelisimler jolı menen sheshiw ushın sharayat jaratatuǵının, ekonomika, sonıń ishinde, Awǵanstan menen sawda baylanısların rawajlandıratuǵının atap ótti.
Sonday-aq, xatta bılay delingen:
«Regionallıq birge islesiwdi rawajlandırıwǵa qaratılǵan is-háreketlerińiz úlken jetiskenlikler alıp keldi. Ótken jılı noyabr ayında Samarqandta bolıp ótken konferenciya pútkil Oraylıq Aziya boylap perspektivalı birge islesiw ortalıǵın jarattı, dekabr ayındaǵı Prezident Ashraf Ǵani menen ushırasıwıńız bolsa bekkem birge islesiwge hám rawajlanıwǵa tiykar jarattı.
Siziń Awǵanstan boyınsha xalıqaralıq konferenciya ótkeriwge baylanıslı baslamańızdı tolıq qollap-quwatlayman, solay eken, bul format awǵanstanlılar basshılıq etip atırǵan Qabul procesi menen muwapıqlastırıwın támiyinlew ushın biz birgelikte haq niyet penen islesiwimiz zárúr. Aq úy hákimshiligi Tashkenttegi konferenciyaǵa qatnasatuǵın AQSh delegaciyasınıń quramın kórip shıqpaqta.
Shın júrekten hám jıllı sózlerińiz, sonday-aq, Awǵanstandaǵı birliktegi háreketlerge qosıp atırǵan úlken úlesińiz ushın minnetdarshılıq bildiriwge ruqsat etkeysiz. Ózbekstan xalqına sálemimdi hám jaqsı tileklerimdi jetkeriwińizdi sorayman.
Jaqın kúnlerde Siz benen ushırasıwdı intizarlıq penen kútip qalaman.
Húrmet penen,
Donald TRAMP,
Amerika Qurama Shtatlarınıń Prezidenti»