Ózbekstan Respublikası Prezidenti Shavkat Mirziyoev 28-fevral kúni Pakistan Islam Respublikası, Shveycariya Konfederaciyası, Latviya Respublikası, Izrail Mámleketi, Germaniya Federativlik Respublikası, Slovakiya Respublikası hám Qıtay Xalıq Respublikasınıń elimizdegi Ayrıqsha hám tolıq huqıqlı elshileri etip tayınlanǵan Irfon Yusuf Shomiy, Olive Shav, Mixails Popkovs, Eduard Shapira, Gyunter Overfeld, Yan Bori hám Czyan Yannan isenim jarlıqların qabıl etip aldı.

Mámleketimiz basshısı elshilerdi elimizde diplomatiyalıq missiyasın baslaǵanı menen shın júrekten qutlıqlap, juwapkershilikli jumısında úlken tabıslar hám jetiskenlikler tiledi.

Máresimde Ózbekstan kúshli puqaralıq jámiyeti hám jedel rawajlanıp baratırǵan bazar ekonomikasına iye erkin hám demokratiyalıq mámleket qurıwdıń jańa tarıyxıy basqıshına qádem qoyǵanı ayrıqsha atap ótildi.

Ózbekstandı bunnan bılay da rawajlandırıw boyınsha Háreketler strategiyası sheńberinde baslanǵan keń kólemli reformalar hám ózgerisler belgili baǵdar almaqta.

Ashıq-aydın sırtqı siyasat alıp barmay, kóp qırlı óz-ara paydalı xalıqaralıq birge islesiwdi bekkemley turıp belgilengen wazıypalardı ámelge asırıp bolmaytuǵını atap ótildi.

Ózbekstan Respublikasınıń sırtqı siyasatında oǵada qısqa dáwirde salmaqlı nátiyjeler qolǵa kirgizildi. Shet el mámleketleri, abıroylı xalıqaralıq hám regionallıq shólkemler menen qatnasıqlar sapa jaǵınan jańa basqıshqa kóterildi.

Mámleketimiz basshısı Ózbekstannıń Oraylıq Aziyada qáwipsizlik, turaqlılıq hám izbe-iz rawajlanıwdı támiyinlewde bunnan bılay da barlıq is-háreketlerin jumsaytuǵını hám ashıq-aydın, doslıq hám ámeliy sırtqı siyasat alıp bırıwdı dawam etetuǵının atap ótti. Onda bárinen burın qońsı mámleketler menen qatnasıqlarǵa ayrıqsha itibar beriledi.

Sonday-aq, dúnyanıń jetekshi mámleketleri menen óz-ara paydalı hám uzaq múddetli sheriklikti keńeytiw siyasatı dawam ettiriledi.

Prezidentimiz óziniń shıǵıp sóylewinde jańa elshilerdi tayınlaǵan eller menen doslıq baylanıslardı hám óz-ara paydalı birge islesiwdi rawajlandırıw hám bekkemlewdiń tiykarǵı baǵdarlarına toqtap ótti.

Ózbekstan Respublikası regionallıq qáwipsizlikti hám turaqlılıqtı támiyinlewde dástúriy túrde ayrıqsha orın iyelep atırǵan Pakistan Islam Respublikası menen kóp qırlı qatnasıqlardı rawajlandırıwǵa úlken áhmiyet berip atırǵanı atap ótildi.

Joqarı dárejedegi turaqlı siyasiy sóylesiwler eki tárepleme birge islesiwdi sezilerli jedellestiriwge xızmet etti. Sonıń menen birge, óz-ara sawda-satıq kólemin arttırıw, agrosanaat, farmacevtika, kánshilik hám basqa da tarmaqlarda kooperaciyanı kóbeytiw ushın úlken potencial bar.

Shveycariya Konfederaciyası Ózbekstannıń Evropadaǵı isenimli hám uzaq múddetli sherigi bolıp esaplanadı.

Búgingi kúnde Ózbekstan-Shveycariya qatnasıqları siyasat, ekonomika, qarjı hám bank, mádeniyat hám bilimlendiriw sıyaqlı túrli tarawlarda tabıslı rawajlanbaqta. Shveycariya rawajlanıw hám birge islesiw agentligi menen nátiyjeli sheriklik jolǵa qoyılǵan.

Shveycariyanıń jetekshi kompaniyaları menen ximiya, toqımashılıq, farmacevtika, azıq-awqat sanaatı, densawlıqtı saqlaw hám turizm tarawında kooperaciya ushın imkaniyatlar bar ekenligi ayrıqsha atap ótildi.

Latviya Respublikası menen belsendi siyasiy sóylesiw jolǵa qoyılǵan, ekonomikalıq hám mádeniy-gumanitarlıq baylanıslar izbe-iz rawajlanbaqta.

Rigada ullı ata-babalarımız Mırza Ulıǵbek hám Abiw Áliy ibn Sino estelikleri ornatılǵanı elimizge hám xalqımızǵa bolǵan joqarı húrmettiń belgisi bolıp esaplanadı.

Sawda, investiciya hám innovaciyalar, transport hám logistika, energetika, farmacevtika, awıl-xojalıǵı hám turizm tarawlarındaǵı baǵdarlamalar menen joybarlardı ámelge asırıw ellerimiz arasındaǵı birge islesiwdiń perspektivalı baǵdarları ekeni atap ótildi.

Ózbekstan Izrail Mámleketi menen óz-ara húrmet hám máplerdi esapqa alıw principleri tiykarında eki tárepleme birge islesiwdi rawajlandırıwdan mápdar ekeni atap ótildi.

Izraildıń aldınǵı texnologiyaların, tájriybesin, ilimiy jetiskenliklerin tartıw tiykarında biotexnologiyalar, energiya hám suw nasosların únemlew, medicina hám farmacevtika, turizm sıyaqlı baǵdarlarda qospa joybarlardı ámelge asırıw usınıs etildi. Bilimlendiriw, mádeniyat hám sport tarawlarında bar úlken potencialdan paydalanıw zárúrligine itibar qaratıldı.

Elimizdiń isenimli hám uzaq múddetli sherigi bolǵan Germaniya Federativlik Respublikası menen barlıq tarawlarda belsendi sóylesiw jolǵa qoyılǵan, tıǵız baylanıslar hám tájriybe almasıw qollap-quwatlanbaqta.

Tiykarǵı itibar elimiz ekonomikasınıń joqarı texnologiyalıq tarmaqlarında qospa joybarlardı ámelge asırıw maqsetinde Germaniyanıń jetekshi kompaniyaları menen uzaq múddetli hám óz-ara paydalı sheriklik baylanıslırın rawajlandırıwǵa qaratıldı.

Ilim hám bilimlendiriw tarawlarında birge islesiwdi rawajlandırıw, eki el aymaqları arasında baylanıslar ornatıw hám rawajlandırıw zárúrligi atap ótildi.

Slovakiya Respublikası Ózbekstan ushın Evropadaǵı perspektivalı birge islesiwshilerden biri esaplanadı.

Mámleketimiz basshısı siyasiy sóylesiwdi bekkemlew menen bir qatarda sawda-ekonomikalıq hám investiciya tarawlarında bar potencialdı júzege shıǵarıwdı usınıs etti. Bul jerde, bárinen burın, elektrotexnika, farmacevtika, qurılıs materialların islep shıǵarıw, ximiya hám azıq-awqat sanaatında qospa joybarlardı ámelge asırıw ayrıqsha áhmiyetke iye.

Ózbekstan Prezidenti Qıtay Xalıq Respublikası menen doslıq hám hár tárepleme strategiyalıq sheriklik qatnasıqları izbe-iz bekkemlenip atırǵanın tereń qanaatlanıwshılıq penen atap ótti.

Eki mámleket basshılarınıń ótken jılı Pekin hám Astana qalalarında bolıp ótken ushırasıwları óz-ara birge islesiwdi sapa jaǵınan jańa dárejege alıp shıǵıp, anıq mazmun menen bayıttı.

Mámleketimiz basshısı birge islesiwdiń barlıq tarawlarında, atap aytqanda, sawda-ekonomikalıq, investiciya, innovaciya, qarjı-texnikalıq, transport kommunikaciyaları hám basqa da baǵdarlardaǵı sheriklikti tereńlestiriw ushın keń imkaniyatlar bar ekenligin ayrıqsha atap ótti.

Transport-tranzit jolların rawajlandırıwǵa qaratılǵan regionallıq joybarlardı ámelge asırıw, atap aytqanda, Ózbekstan-Qırǵızstan-Qıtay temir jol magistralın qurıw zárúrligi atap ótildi.

Ózbekstan-Qıtay menen ilim, mádeniyat, bilimlendiriw hám turizm tarawlarındaǵı óz-ara paydalı birge islesiwdi keńeytiwge tayar ekenligi atap ótildi.

Ózbekstan Prezidenti sóziniń juwmaǵında shet el elshilerine elimizdiń ministrlikleri, vedmostvoları hám shólkemleri menen belsene islesiw, orınlardaǵı potenciallar menen imkaniyatlar, xalqımızdıń bay tariyxı hám mádeniyatı menen jaqınnan tanısıw ushın aymaqlarǵa tez-tez kelip turıwın usınıs etti.

Hár qıylı juwapkershilikli lawazımlardaǵı jumısı dawamında toplanǵan tájiriybe shet el diplomatlarına belgilengen maqsetlerge nátiyjeli erisiw hám Ózbekstan menen eki tárepleme qatnasıqlardı bekkemlew jolında ózine júklengen áhmiyetli missiyanı tabıslı orınlawǵa xızmet etetuǵınına isenim bildirildi.

Óz gezeginde, jańadan tayınlanǵan elshiler shın júrekten qabıllaǵanı ushın mámleketimiz basshısına minnetdarshılıq bildirip, ellerimiz arasındaǵı keń kólemli hám óz-ara paydalı birge islesiwdi rawajlandırıwǵa bar is-háreketlerin jumsaytuǵının atap ótti.

ÓzA