Тахтакўпирда кийик овлаган браконьерлар қўлга олинди

Қорақалпоғистон Республикасининг Тахтакўпир тумани ҳудудида навбатдаги рейд ўтказилганда овлаш ман қилинган ёввойи ҳайвонларни ноқонуний овлаб юрган браконьерлар аниқланиб, қўлга олинди.
Қорақалпоғистон Республикаси экология ва атроф-муҳитни муҳофаза қилиш давлат қўмитасининг жамоатчилик ва оммавий ахборот воситалари билан ҳамкорлик бўлими хабарига кўра, Тахтакўпир тумани «Қўнғироткўл» ОФЙ ҳудудида кетаётган фуқаролар М.Д., Т.М., А.Ж. ва Қ.Қларнинг бошқарувидаги УАЗ-469 маркали давлат белгиси 95 J 752 EA автотранспорт тегишли тартибда текширилиб кўрилганда 3 та жайрон кийигини отиб ўлдиргани маълум бўлди. Текширув натижасида ИЖ-58 2х 12 калибрли №Р-05351 ов милтиғи фуқаро Қ.Қга тегишли бўлиб чиқди. Автомашина, ов милтиқлари, прожектор, ўқлар, 3 та ўлик ҳолдаги жайрон кийиклар ашёвий далил сифатида олиб қўйилди.
Ҳозирда браконьерлар томонидан табиатга келтирилган зиён миқдори аниқланмоқда.

 

Е.ҚАНОАТОВ, ЎзА