O‘zbekiston Respublikasi Ichki ishlar vazirligi akademiyasi hamda Respublika satira teatri hamkorligida “Yoshlar – kelajak bunyodkori” mavzuida madaniy-ma’rifiy tadbir o‘tkazildi.
Unda madaniyat arboblari, taniqli ijodkorlar, san’at vakillari, professor-o‘qituvchilar, akademiya kursantlari hamda ommaviy axborot vositalari vakillari ishtirok etdi.
Tadbirda so‘zga chiqqanlar mamlakatimizda olib borilayotgan islohotlar, xalqimiz, ayniqsa, yoshlarimizga ko‘rsatilayotgan g‘amxo‘rlik va e’tibor tufayli ularning iqtidor va salohiyati to‘la qo‘llab-quvvatlanayotgani hamda rag‘batlantirilayotganini alohida ta’kidladi.
Tadbir davomida Ichki ishlar vazirligi akademiyasi tomonidan Yoshlar kuni munosabati bilan o‘tkazilgan “Eng yaxshi she’r”, “Eng yaxshi maqola”, “Eng yaxshi hikoya” ko‘rik-tanlovi g‘oliblari taqdirlandi. Tanlov g‘oliblariga diplom va esdalik sovg‘alar topshirildi.
Respublika satira teatri ijodkorlari hamda akademiya badiiy havaskorlik jamoasi a’zolarining chiqishlari va yangicha talqinda sahnalashtirilgan “Arshin mololan” spektaklining namoyishi ishtirokchilarda katta taassurot qoldirdi.
G.Boboyeva, O‘zA