Әзербайжанның пайтахты Баку қаласында Түркий тиллес мәмлекетлер бирге ислесиў кеңесиниң жетинши саммити басланды.
Саммитте Өзбекстан Республикасы Президенти Шавкат Мирзиёев, Әзербайжан Республикасы Президенти Илҳам Алиев, Түркия Республикасы Президенти Режеп Таййип Эрдўғон, Қырғызстан Республикасы Президенти Сооронбай Жээнбеков, Қазақстан Республикасының Биринши Президенти Нурсултан Назарбаев қатнаспақта.
Венгрия Республикасы Бас министри Виктор Орбан әнжуманға ҳүрметли мийман сыпатында келген.
Әзербайжан Республикасы Президенти Илҳам Алиев саммитти ашып берип, Президент Шавкат Мирзиёевти Өзбекстанның Түркий тиллес мәмлекетлердиң бирге ислесиў кеңесине ағза болғаны мүнәсибети менен қулықлады. Өзбекстан басшысының бул қарары түркий тиллес мәмлекетлердиң аўызбиршилигине ҳәм үзликсиз раўажланыўына хызмет ететуғынын атап өтти.
Еслетип өтемиз, Өзбекстан Түркий тиллес мәмлекетлердиң бирге ислесиў кеңеси саммитинде биринши рет толық ҳуқықлы ағза сыпатында қатнаспақта. Мәмлекетимиз бул абырайлы халықаралық структураға усы жылы қосылды.
Түркий кеңестиң Баку саммити экономика, киши ҳәм орта бизнести қоллап-қуўатлаў темасына бағышланған. Усы мүнәсибет пенен саммитте түркий мәмлекетлердиң экономикалық бирге ислесиўи ҳәм аўызбиршиликтеги раўажланыўы менен байланыслы болған көплеген мәселелердиң додаланыўы нәзерде тутылған.
Бизге белгили, 2018-2019-жылларда Қырғызстан Республикасы Түркий тиллес мәмлекетлердиң бирге ислесиў кеңесине басшылық етти. Саммитте Президент Сооронбай Жээнбеков Қырғызстан Республикасының шөлкемке басшылығы дәўиринде әмелге асырылған жумыслар ҳаққында шығып сөйледи.
Баку саммитте Түркий тиллес мәмлекетлер бирге ислесиў кеңесиниң жетинши саммити декларациясы, Түркий кеңеске ағза мәмлекетлер басшыларының Өзбектсан Республикасының толық ҳуқықлы ағза сыпатында Шөлкемге қосылыўы ҳаққында Биргеликтеги баянатының қабыл етилиўи режелестирилген.
Матназар Элмуродов, ӨзА