Ташкент, Нөкис, Үргенш ҳәм Жиззақта Европа киносы күнлери болып өтеди.

11-октябрьден 10-ноябрьге шекем Өзбекстанның төрт қаласы – Ташкент, Нөкис, Үргенш ҳәм Жиззақта Европа киносы фестивалы өткериледи. Илаж «Өзбеккино» Миллий агентлиги тәрепинен Европа Аўқамының Өзбекстандағы Делегациясы менен бирге, Өзбекстан Электрон ғалаба хабар қураллары Миллий ассоциациясының (ЭҒХҚМА) жәрдеминде өткериледи. Бул ҳаққында gazeta.uz  сайты мәлим етти.

ЕА Делегациясының хабар бериўинше, жетинши рет өткерилип атырған фестиваль шеңберинде Европаның 12 мәмлекети: Австрия, Бельгия, Болгария, Венгрия, Германия, Дания, Италия, Латвия, Голландия, Финляндия, Франция ҳәм Швецияның белгили режиссёрлары тәрепинен жаратылған 10 фильм көрсетиледи.

Олар: «Бельгиялылардың патшасы» комедия жанрында сүўретке алынған драма, «Қыстағы Луиза» анимациялық фильми, «Стефан Цвеиг: Европа менен хошласыў» ҳүжжетли фильми, «Имтихан» ҳәм «Киши фермер» драмалары, қандай да бир инсанның қәдирине түспеген «Ҳомо сапиенс» фильми, «Алыстағы күшиклердиң даўысы» ҳүжжетли фильми, криминал элементлерине ийе «Чямбра» драмасы, «Өмирдеги ең бахытлы күн» атлы кеўилли ҳүжжетли фильм ҳәм «Жәннет 89» көркем фильмлер.

Ашылыў мәресими 11-октябрь Ташкентте, ЭҒХҚМАниң «Медиа-холл» имаратында болып өтеди. Фестиваль Ташкентте 18-октябрьге шекем даўам етеди, фильмлер Нөкисте – 24-26-октябрь, Үргенште – 1-3-ноябрь ҳәм Жиззақта – 8-10-ноябрь күнлери көрсетиледи.

Барлық фильмлер рус ҳәм өзбек тилиндеги субтитрлар менен оригинал тилинде көрсетиледи. Барлық киносеансларға кириў – бийпул.

 

Қарақалпақстан хабар агентлиги