Өзбекстан Республикасы Президенти Шавкат Мирзиёев 7-октябрь күни Тәжикстан Республикасы Олий Мажлиси Ўәкиллер палатасының баслығы Шукуржон Зуҳуровтың басшылығындағы делегацияны қабыл етти.
Мәмлекетимиз басшысы мийманларды қутлықлап, өз-ара исенимге тийкарланған жоқары дәрежедеги турақлы сөйлесиўлер еки тәреплеме бирге ислесиўди мисли көрилмеген жоқары дәрежеге көтериўге хызмет еткенин үлкен қанаатланыўшылық пенен атап өтти.
Усы мүнәсибет пенен Тәжикстан парламенти делегациясының Өзбекстанға сапары туўысқан мәмлекетлеримиз арасындағы дослық, жақсы қоңсышылық ҳәм стратегиялық шериклик қатнасықлары беккемленип атырғанының айқын дәлийли болып есапланады.
Жоқары мәртебели мийман, өз гезегинде Президентимиз Шавкат Мирзиёевқа қызғын қабыл еткени ушын миннетдаршылық билдирди ҳәм Тәжикстан Республикасының Президенти Эмомали Раҳмонның сәлеми ҳәм жақсы тилеклерин жеткерди.
Ушырасыўда өз-ара байланыслар барлық дәрежелерде жеделлескени атап өтилди.
Өз-ара товар алмасыў көлеми артпақта, санаат, энергетика, транспорт, аўыл хожалығы ҳәм басқа да бағдарларда кооперация жойбарлары әмелге асырылмақта.
Шегаралас аймақлар арасында, мәдений-гуманитарлық тараўда алмасыўлар кеңеймекте.
Парламентлераралық байланысларды беккемлеўге үлкен әҳмийет қаратылмақта.
Жоқары дәрежеде ерисилген келисимлерди әмелге асырыў мақсетинде комитетлер ҳәм парламентлераралық топарлар дәрежесинде жақыннан бирге ислесиўди жолға қойыў әҳмийетли екенлиги атап өтилди.
Ушырасыў соңыңда Шукуржон Зухуров Тәжикстан парламенти туўысқан мәмлекетлеримиз ҳәм халықларымыздың мәплери жолында дослық ҳәм стратегиялық шерикликти және де беккемлеўге ҳәр тәреплеме жәрдемлесиўге таяр екенин атап өтти.
Тәжикстан Олий Мажлиси Ўәкиллер палатасының баслығы усы жылы декабрь айында мәмлекетимиздиң парламентине сайлаўлардың табыслы өтиўине тилеклеслик билдирди.
ӨзА