Нөкис районынан үш мектеп оқыўшысы белбеўли гүрес бойынша жәҳән чемпионатында жеңимпаз болды ҳәм 4 мың доллар утып алды

Усы жылдың 8-11-август күнлери Ташкент ўәлаятының Алмалық қаласында Өзбекстан Республикасы Президенти сыйлығы ушын белбеўли гүрес бойынша жәҳән чемпионаты болып өтти.

Чемпионатқа қатнасқан Нөкис районындағы 12-санлы улыўма билим бериў мектебиниң 10-класс оқыўшысы Умида Айтмуратова 70 килограмм салмақта 1-орын, Гүлимхан Орынбаева 44 килограмм салмақта 1-орынды ҳәм Улмекен Узақбергенова 57 килограмм салмақ бойынша 2-орынды ийеледи. Бул ҳаққында бизге район ҳәкимлиги мәлимлеме хызмети хабар берди.

Жеңимпаз ҳәм сыйлы орын ийелери болған спортшыларымызға Президент саўғалары – 1-орын ушын сәйкес түрде 1500 АҚШ доллары, 2-орын ушын 1000 АҚШ доллары муғдарында сыйлық тапсырылды.

Жеңимпаз спортшыларымыз район ҳәкимлиги, кең жәмийетшилик ўәкиллери ҳәм ғалаба хабар қураллары хызметкерлери тәрепинен күтип алынды.

 

Ислам Матеков,

Қарақалпақстан хабар агентлигиниң шолыўшысы.

  13.08.2019, 13:48  |    142 мәрте көрилди

Thanks!

Our editors are notified.