Өзбекстан Республикасы Президенти Шавкат Мирзиёев 8-август күниниң ақырында Қырғызстан Республикасы Президенти Сооронбай Жээнбеков пенен телефон арқалы сөйлести.

Мәмлекет басшылары сиясий, саўда-экономикалық ҳәм мәдений-гуманитарлық тараўлардағы еки тәреплеме бирге ислесиўдиң әҳмийетли мәселелерин додалады.

Сөйлесиўде Қырғызстанда тынышлық ҳәм турақлылықты сақлаў әҳмийетли екенлиги айрықша атап өтилди. Қоңсы мәмлекеттеги жағдай әмелдеги нызамшылық шеңберинде тез арада турақласатуғынына үмит билдирилди.

Өзбекстан – Қырғызстан Мәмлекетлик шегарасын ҳуқықый жақтан рәсмийлестириў мәселелери бойынша тығыз бирге ислесиў және Шегарада исеним илажлары ҳаққындағы шәртнамаға муўапық оның қәўипсизлигин беккемлеў зәрүр екенлиги атап өтилди.

Сөйлесиў жуўмағында мәмлекет басшылары кең көлемли бирге ислесиўди буннан былай да жедел раўажландырыў, дослық, жақсы қоңсышылық ҳәм стратегиялық шерикликке тийкарланған еки тәреплеме қатнасықларды беккемлеў бағдарындағы умтылысы исенимли екенлигин тастыйықлады.

ӨзА