«Бүгинги күнде пүткил дүнья жүзинде инсанияттың келешегине қәўип салатуғын бир қанша факторлар елеге шекем сақланып қалмақта. Мине, усындай қәўип-қәтерлерден биреўи нәшебентлик иллети болып есапланады.
Бажыхана хызметкерлери тәрепинен инсаниятқа қәўипли болған усындай нәшебентлик затлардың елимизге кирип келиўиниң өз ўақтында алды алынбақта.
Атап айтқанда, Қарақалпақстан Республикасы бажыхана басқармасы «Хожели» шегара бажыхана постының хызметкерлери тәрепинен елимизге кирип келген пуқара Ф.Д.ға тийисли «Volkswagen» маркалы автотранспорт қуралы белгиленген тәртипте бажыхана тексериўинен өткерилгенде, усы автотранспорт қуралында аўырлығы 11,07 грамм болған көкнар өсимлигиниң кептирилген дәнлери жасырылғанлығы анықланды, деп жазады custom.uz.
Сондай-ақ, және бир жағдай Сурхандәрья ўәлаятының бажыхана басқармасы «Айритом» шегара бажыхана посты арқалы елимизге кирип келген пуқара Н.А. белгиленген тәртипте бажыхана қадағалаўынан өткерилди.
Нәтийжеде, усы пуқараға тийисли қалташа ашып көрилген ўақытта, оның ишинен реңсиз целофанға оралған 0,55 грамм «гашиш» нәшебентлик заты табылды.
Ҳәзирги ўақытта бул жағдайлар бойынша бажыхана тексериўлери даўам етпекте.
Қарақалпақстан хабар агентлиги