Нөкис мәмлекетлик педагогикалық институтында магистратура қәнигеликлерине имтиханлар басланды

Бүгин, 5-август күни Әжинияз атындағы Нөкис мәмлекетлик педагогикалық институтында 2019-2020-оқыў жылы ушын магистратура қәнигеликлерине ҳүжжет тапсырған талабанлар арасында қәнигелик пәнлерден имтиханлар басланды.

Имтиханлардың әшкара ҳәм объектив түрде өтиўин тәмийинлеў мақсетинде институттың үлкен сыйымлылыққа ийе спорт залында шараятлар жаратылып, бақлаўшылар ҳәм қадағалаў камералары менен тәмийинленди.

Қәнигелик пәнлерден имтиханлар еки мезгилде – саат 08:30 ҳәм 14:00 ден баслап өткерилмекте.

Еслетип өтемиз, Әжинияз атындағы Нөкис мәмлекетлик педагогикалық институтына 2019-2020-оқыў жылы ушын улыўма 19 магистратура қәнигеликлерине 354 талабан ҳүжжет тапсырды.

Мағлыўмат ушын, быйылғы жылдан баслап магистратура қәнигеликлерине кириў имтиханлары қәнигелик пән ҳәм инглис тилинен өткериледи.

 

Ислам Матеков,

Қарақалпақстан хабар агентлиги.

  05.08.2019, 14:17  |    142 мәрте көрилди

Thanks!

Our editors are notified.