Усы жылдың 18-27-июнь күнлери Өзбекстанның бес қаласында үлкен музыкалы жойбар – «OPEN AIR. SAHRO SIMFONIYASI» болып өтеди.
Дәстүрге айланған жойбар Өзбекстан Миллий симфониялық оркестриниң жанлы концертлери ҳәм миллий эстрада көркем өнери шеберлери менен жас атқарыўшыларының шығыўларын өзинде жәмлеген.
Жойбар Нөкисте И.В.Савицкий атындағы мәмлекетлик көркем өнер музейи жанындағы орайлық майданда басланады. Музыка кәрўаны концертлер менен Хийўа, Термиз, Қаршы ҳәм Шаҳрисабз қалаларының тарийхый ҳәм көркем өнер майданларында жолын даўам еттиреди.
Соның ишинде, 18-июнь күни Нөкис қаласы И.В.Савицкий атындағы мәмлекетлик көркем өнер музейи алдындағы ашық майданда старт алып, 20-июнь күни Хийўа қаласындағы «Ийшан қала» архитектуралық ансамблинде, 23-июнь күни Термиз қаласы Сурхандәрья ўәлаяты Көркем өнер сарайы амфитеатрында, 25-июнь күни Қаршы қаласындағы орайлық амфитеатрда ҳәм 27-июнь күни Шаҳрисабз қаласы «Ақ сарай» тарийхый естелиги алдындағы ашық майданда өткериледи.
Барлық майданларда жойбар ушын шөлкемлестирилген концерт заллары, 3 мыңнан 5 мыңға шекем отырғышлар, музыкалы шырақ үскенелери менен безелген сахна, қаланың өзине тәнлигин сәўлелендиретуғын визуал экранлар қурылады.
Концерт бағдарламаларының ҳәр бири ўәлаятлардың өзине тән тәреплерин есапқа алған ҳалда айрықша дүзилген. Концерт бағдарламасы көркем шығармалар, белгили романтикалық қосықлар ҳәм опера музыкалары, фильмлердиң музыкалары, аяқ ойын композицияларының таңлаўлары, тамашагөйлер ушын күтилмеген саўға және көплеген қызықлы «көринис»лерди өз ишине алған бес түрдеги шоулардан ибарат.
Жойбар Өзбекстан Республикасы Мәденият министрлиги, Өзбекстан Республикасы Туризмди раўажландырыў бойынша мәмлекетлик комитети, Қарақалпақстан Республикасы Министрлер Кеңеси, Өзбекстан мәмлекетлик филармониясы, Хорезм, Сурхандәрья ҳәм Қашқадәрья ўәлаятларының ҳәкимликлери менен биргеликте әмелге асырылмақта.
Open Air Music жойбары еки жылдан берли өткерилип келинбекте. Усы ўақыт даўамында Өзбекстан бойлап ашық аспан астында 13 концерт бағдарламалары шөлкемлестирилген. Концерт бағдарламасына келиўшилердиң саны болса 100 мыңнан артқан.
Е.ҚАНААТОВ, ӨзА