Жақында, Өзбекстан Республикасы Президентиниң 2018-жыл 3-октябрьдеги арнаўлы қарары менен Қарақалпақстан Республикасы Экология ҳәм қоршаған орталықты қорғаў комитетиниң Биокөптүрлилик ҳәм қорғалатуғын тәбийғый аймақларды қорғаў бөлими қайта дүзилген еди.

– Бул инспекторларымыз тәрепинен аңшылық, балық аўлаў, сексеўил, тораңғыл сыяқлы тоғай ағашларын шаўып сатыў менен нызамсыз түрде шуғылланып атырғанларды анықлаў бойынша исленип атырған жумыслардың нәтийжели болыўына алып келмекте,-дейди бөлимниң жетекши қәнигеси С.Рейимбаев. – Усы жылдың январь айының еки он күнлигиниң өзинде инспекторларымыз тәрепинен өсимлик бойынша 59 пуқараға 5 миллион 878 мың 176 сум жәрийма салынып, бүгинги күнде 4 миллион 661 мың 790 сум өндирилди.

Соннан, 43 пуқараның 33 миллион 246 мың 534,8 сумлық зыян келтиргени есапланып,  олардан 15 миллион 270 мың 466,5 сумлық зыян өндирилди.

Аңшылық бойынша 3 пуқараға 606190 сум жәрийма қолланылып, 403460 сум өндирилди.

Атап айтқанда, Тақыятас районында пуқара А.П. 15-январь күни 520 килограмм, Кегейли районында пуқара А.Ж. 16-январь күни 250  килограмм, Қоңырат районында пуқара Н.М. 17-январь күни 1830 килограмм боян тамырын нызамсыз түрде қопарып алып баратырғанында иркилип, тийисли тәртипте баянлама дүзилди. Өткерилген арнаўлы илажлар барысында усы күнлери боян тамырын нызамсыз түрде қопарып алыў, сексеўил, тораңғыл ҳәм басқа да өсимликлерди шаўып алып баратырған 50ден аслам пуқара иркилип, анықланған фактлер бойынша шара көриў ушын тийисли жумыслар әмелге асырылмақта.

Ҳәзирги ўақытта қорғалатуғын тоғай хожалықлары аймақларындағы әмелге асырылып атырған арнаўлы рейдлер даўам етпекте.

 

Қарақалпақстан Хабар агентлиги.