Тутыныўшылардың ҳуқықларын қорғаў жәмийетлери федерациясы Өзбекстан базарларындағы баҳаларды үйрениўди даўам еттирмекте, деп жазады Uz24 сайты.
Мағлыўматта келтирилиўинше, ең арзан макарон, мал гөши ҳәм ең қымбат картошка ҳәм помидор Нөкис дийқан базарында екенлиги анықланған.
2018-жылдың 10-декабрь ҳалаты бойынша Өзбекстан көлеминде макарон 2500 сумнан 6000 сумға шекем сатылып атырған болып, ең арзан баҳа Нөкис дийқан базарында 2500 сумнан 3000 сумға шекем, ал ең қымбат баҳа Бухара қаласындағы Орайлық дийқан базарында 4000 сумнан 6000 сумға шекем сатылмақта.
Өзбекстан бойынша мал гөшиниң бир килограмын 26000 сумнан 40000 сумға шекем сатып алыў мүмкин болып, бул бойынша ең арзан баҳа Нөкис дийқан базарында 26000 сумнан 40000 сумға шекем, ал Ташкент орайлық базарларында 28000 мыңнан 38000 сумға шекем сатып алыў мүмкин.
Картошканың ең арзаны Ташкент қаласындағы Чорсу дийқан базарында 1100 сумнан 2000 сумға шекем, ал ең қымбаты болса Нөкис қаласындағы дийқан базарында 2000 сумнан 3000 сумға шекем сатылмақта.
Сондай-ақ, помидордың ең арзан баҳасы Ташкенттеги Юнусабад дийқан базарында 3000 сумнан 5000 сумға шекем сатылып атырған болса, ең қымбаты Нөкис дийқан базарында 5000 сумнан 11000 сумға шекемги муғдарда сатылмақта.
Ислам Матеков,
Қарақалпақстан хабар агентлигиниң шолыўшысы.