«Өзбекстан-Россия билимлендириў форумы» шеңберинде «Олимпия шон-шуҳрати» музейинде Өзбекстан Республикасы денетәрбия ҳәм спорт министри Д.Набиев Россияның П.Ф.Лесгафт атындағы денетәрбия, спорт ҳәм саламатлық мәмлекетлик миллий университетиниң ректоры С.Бакулев пенен ушырасты.
Ушырасыўда спорт тараўы бойынша еки мәмлекет арасында бирге ислесиўди күшейтиў. қысқы спорт түрлери, спорт менеджменти, психологиясы бойынша тренерлерди таярлаў, олардың қәнигелигин арттырыў тараўында өз-ара тәжирийбе алмасыў сыяқлы мәселелер додаланды. Бир қатар әҳмийетли бағдарлар, соның ишинде, Өзбекстан мәмлекетлик денетәрбия ҳәм спорт университети менен биргеликте қоспа диплом берилетуғын факультет ҳәм елимизде П.Ф.Лесгафт атындағы денетәрбия, спорт ҳәм саламатлық мәмлекетлик миллий университетиниң филиалын ашыў бойынша келисимлерге ерисилди.
Еки университет арасында өз-ара бирге ислесиў шәртнамасына қол қойылды.
-Елиңизде Президент Шавкат Мирзиёев тәрепинен денетәрбия ҳәм спорттың раўажланыўына қаратылып атырған итибар ҳәзир өз нәтийжесин берип, өзбек спортшылары жәҳән ареналарында жоқары орынларды ийелемекте,- дейди С.Бакулев. – Бизиң университетте де спорт ҳәм тренерлер таярлаў бойынша жоқары қәнигели қәнигелер ҳәм үлкен илимий изертлеўлер бар болып, сиз бенен өз-ара тәжирийбени бөлисиўге, бирге ислесиўге таярмыз.
Ушырасыўда С.Бакулевке Өзбекстан мәмлекетлик денетәрбия ҳәм спорт университетиниң «Ҳүрметли профессор» атағы берилди.
Россиялы мийман пайтахтымыздағы бир қатар спорт имаратлары ҳәм билимлендириў мәкемелериниң жумысы, елимизде спорт пенен шуғылланыў ушын жаратылған шараятлар менен танысты.
Санкт-Петербург қаласында жайласқан П.Ф.Лесгафт атындағы денетәрбия, спорт ҳәм саламатлық мәмлекетлик миллий университети тек Россияда емес, ал дүньяда өз бағдары бойынша жетекши жоқары билимлендириў мәкемелеринен бири болып есапланады. 1896-жылы тийкар салынған университетте бүгинги күнге шекем 1700 ден аслам хызмет көрсеткен ҳәм халықаралық категориядағы спорт шеберлери таярланған. Университеттиң 300 ден аслам студенти Европа ҳәм жәҳән чемпионатларында жеңимпаз ҳәм сыйлы орын ийелери болған.
Жавоҳир ТОШХЎЖАЕВ,
ӨзАның хабаршысы