Бердақ атындағы Қарақалпақ мәмлекетлик университетинде Қазақстан Республикасы хәм Қарақалпақстан Ресубликасы жоқары оқыў орынлары арасында өз-ара бирге ислесиўди жолға қойыў мақсетинде ушырасыў болып өтти. Онда Қазақстан Республикасындағы жоқары оқыў орынларында жаратылған имканиятлар, шараятлар хаққында мағлыўмат бериўши көргизбелер шөлкемлестирилди.
Ушрасыўда Қазақстанның 12 жоқары оқыў орнынан профессор оқытыўшылар, республикамыздағы барлық жоқары оқыў орынларынан проректорлар қатнасты.
Қарақалпақ елине келиўимиздеги мақсетимиз, еки ел арасындағы дослықты, әсиресе, жоқары оқыў орынлары менен өз-ара бирге ислесиўди жолға қойыў болып табылады. Қазақстан Республикасындағы жоқары оқыў орынларында өзбекстанлы жасларды оқыўға қабыл етиў системалы жолға қойылған. Бизиң елимизде оқыўды қәлеген хәр бир жигит хәм қыз ушын көп имканиятлар жаратылған. Мәселен, шартнама тийкарында оқыўға қабыл етилген Өзбекстан жаслары бир жыл 50 процентлик шегирмелер менен оқыў имканиятларына ийе болады. Сондай-ақ, кем тәмийинленген шаңарақлардың, жалғыз баслы аналардың перзентлерине, спорт бойынша чемпион болғанларға бизиң елимизде оқыў ушын көп жеңилликлер бар, – дейди биз бенен сәўбетинде Қазақстан Республикасы Жәҳән ассосациясы ўәкили Клара Садирбаева Мағлыўмат ушын соныда атап өтиўимиз керек, жоқарыда көрсетилген имканиятлар Қазақстан Республикасыдағы «Алматы» университети, «Туран-Астана» университети, К.Жубанов атындағы Ақтөбе регионаллық мәмлекетлик университети, М.Әўезов атындағы мәмлекетлик университети, «Қорқыт-Ата» атындағы мәмлекетлик университети, Қазақстан-Британия технологиялық университети, Қубла-Қазақстан мәмлекетлик педагогикалық университетлеринде жаратылған.
З.Абубакирова,
ҚМУ журналистика студенти