Ташкент қаласында 19-июнь күни Өзбекстан Республикасы Инвестициялар бойынша мәмлектлик комитети ҳәм Испания инвестиция ҳәм экспорт агентлиги (ICEX) тәрепинен «Ҳәр тәреплеме бирге ислесиў» темасында Өзбекстан-Испания бизнес-форумы шөлкемлестирилди.
Илажда Өзбекстан Саўда-санаат палатасының баслығы Адҳам Икрамов, Испанияның елимиздеги Айрықша ҳәм толық ҳуқықлы елшиси Игнасио Ибаньеса, Испания инвестиция ҳәм экспорт агентлигиниң – ICEX бас директоры Франсиско Хавиер Серра шығып сөйледи.
Атап өтилгениндей, бул форумның мақсети Өзбекстан менен Испания арасында энергетика, транспорт инфраструктуралары, қала суў тәмийнаты ҳәм санитариялық системалары, қатты шығындыларды басқарыў, қурылыс, азық-аўқат санааты ҳәм инжиниринг хожалығы сыяқлы тараўларда исбилерменлик байланысларын беккемлеў, испаниялы исбилерменлер ушын интерактив платформа жаратыў болып есапланады. Бул платформада тәреплер саўда-экономикалық, инвестициялық бирге ислесиўди раўажландырыўға байланыслы усынысларды додалайды.
Өзбекстан-Испания бизнес-форумы Ташкентте бир неше мәртебе шөлкемлестирилди. Бул гезектеги илаж қайсы тәреплери менен бурынғыларынан ажыралып турады?
– Еки ел исбилерменлериниң қатнасыўындағы бизнес-форумда Испанияның 20 ға шамалас компаниясы қатнаспақта, – дейди Өзбекстан Республикасы Инвестициялар бойынша мәмлекетлик комитети баслығының биринши орынбасары Лазиз Қудратов. – Өзбекстан базарында мүнәсип орын ийелеўди гөзлеген Испания компанияларының саны көбейген. Итибарлысы, олар энергетика, аўыл хожалығы, қатты турмыслық шығындыларды қайта ислеў сыяқлы тараўларда Европада жетекши компаниялар болып есапланады. Және бир тәрепи, «Ҳәр тәреплеме бирге ислесиў» форумының өткерилиўи, жақын келешекте Инвестициялар бойынша мәмлекетлик комитетиниң қатнасыўында режелестирилген Өзбекстан Республикасы менен Испания Патшалығы арасында экономика ҳәм санаат тараўындағы бирге ислесиў бойынша биргеликтеги ҳүкиметлераралық комиссияның биринши мәжилисин шөлкемлестириўге таярлық ўазыйпасын да атқарады.
– Бизиң ўазыйпамыз еки ел компаниялары арасында өз-ара бирге ислесиў орнатыўдан ибарат, – дейди Испанияның елимиздеги Айрықша ҳәм толық ҳуқықлы елшиси Игнасио Ибаньесо. – Өзбекстан менен Испания арасында экономикалық байланыслар күн сайын раўажланып бармақта. Соның ишинде, бир неше компанияларымыз өзбекстанлы исбилерменлер менен биргеликте жумыс алып бармақта. Әҳмийетлиси, байланыслар беккемленген сайын бирге ислесиў тараўлары да кеңеймекте.
Бизге белгили, Испания аўыл хожалығы өнимлерин жетистириў ҳәм оны қайта ислеўде бай тәжирийбеге ийе. Патшалықта усы бағдарда көплеген кәрханалар жумыс ислемекте. Олардың ишинде «MultiScan» айрықша орынға ийе болып, усы компанияның мийўе-овощларды реңи, түри ҳәм нуқсанларына қарап сайлаў имканиятын беретуғын заманагөй технологиялары пүткил дүньяға белгили. Бизнес форумда «MultiScan» ның рәсмий ўәкили Хуан Антонио Госальбес Сельес де қатнаспақта.
– Өзбекстанның базарын үйренип бир қатар абзал тәреплерин анықладық, – дейди ол. – Мийўе-овощ жетистириў ҳәм оны экспорт етиў бойынша елиңиздиң потенциалы артып бармақта. Демек, буннан кейин де компаниямыз усынатуғын технологияларға Өзбекстан базарында талап жоқары болады. Усы бизнес форумына бир қатар усыныслар менен келдик. Биз мийўелерди калибрлаў ҳәм аўыл хожалығы өнимлериниң қәўипсизлигин таллаў имканиятын беретуғын рентген үскенелерин өзбекстанлы исбилерменлерге жеткерип бериўге таярмыз.
Бизнес-форумның сессия мәжилислеринде Өзбекстанның Аўыл хожалығы, Суў хожалығы, Турақ жай ҳәм коммуналлық хызметлер министрликлери, Саўда-санаат палатасы, Автомобиль жоллары бойынша мәмлекетлик комитети, «Өзбекэнерго», «Өзбекнефтьгаз» акционерлик жәмийетлериниң ўәкиллери ҳәм испаниялы исбилерменлер арасында саўда-экономикалық ҳәм инвестициялық бирге ислесиўди раўажландырыўға байланыслы усыныслар ҳәм жойбарлар додаланды. Саўда-санаат палатасы тәрепинен В2В форматында Өзбекстан ҳәм Испания исбилерменлери арасында ушырасыў өткериў режелестирилген.
Малохат ҲУСАНОВА,
ӨзАның хабаршысы