26-май күни пайтахтымыздағы Нөкис компьютер ҳәм мәлимлеме технологиялары кәсип-өнер колледжинде Қарақалпақстан Республикасы Ишки ислер министрлиги Өрт қәўипсизлиги басқармасы тәрепинен шөлкемлестирилген «Өрт қәўпи жаслар нәзеринде» атамасында викторина  өткерилди.                                                                                                                                                                                            

Викторина жарысында колледж оқыўшылары сәлемнама, сораў-жуўап, өрт қәўипсизлиги кийимин кийиў (ўақыт бойынша), үйге тапсырма (онда еркин темада сахналық көринис, видеоролик, презентация таярлаў) шәртлери бойынша өз-ара билимлерин сынақтан өткермекте, – дейди Өрт қәўипсизлиги  басқармасының инженер лейтенанты Султан Таңирбергенов. Викторинаны өткериўдеги тийкарғы мақсет, өртлердиң алдын алыўда оқыўшылардың өрт қәўипсизлиги қағыйдаларына болған итибарын, билимин күшейтиў, әмелий шынығыўлар тийкарында билимин беккемлеўден ибарат.

Тәжирийбели төрешилер тәрепинен радио байланыс ҳәм энергетика бөлими биринши, ушыўдың жердеги радио техникалық тәмийинлеў қурылмаларын пайдаланыў техниги бөлими екинши, бағдарламалық инженеринг техниги топары үшинши орынды ийеледи.

Жеңимпазлар шөлкемлестириўшилер тәрепинен таярланған диплом ҳәм естелик саўғалары менен сыйлықланды.

Қарақалпақстан хабар агентлиги