24-апрель күни Өзбекстанда өткерилген Қуран оқыў жарысының Республикалық басқышы жуўмағына жетти. Онда ҳифз ҳәм тиләўат бағдарында жеңимпазлар анықланды. Соның ишинде, жарыстың жоқары орын ийесиниң аты мәлим болды – қарақалпақстанлы Йўлдошбек қарый Нуриддинов. Kun.uz сайтында оның өмирбаяны менен байланыслы мағлыўматлар жәрияланды.
Нуриддинов Йўлдошбек Иброҳим улы 1995-жылы 9-январьда Қарақалпақстан Республикасы Хожели районының Кенегес аўылында дүньяға келген.
Қуран бойынша дәслепки билимин Қарақалпақстанның Беруний районында жасайтуғын Неъматуллаҳ қарый Әминжан ийшаннан алған. 2001-2010-жыллары улыўма билим бериў мектебинде, 2010-2014-жыллары Нөкис қаласындағы Әл-Беруний атындағы орта арнаўлы Ислам оқыў орнында билим алған. Дәслепки Қуран қатымын 2004-жылы Рамазан айында Нөкис қаласындағы «Имәм ийшан Муҳаммед» жәмәәтлик мешитинде орынлаған.
2015-жылдан бүгинги күнге шекем имәм Бухарий атындағы Ташкент Ислам институтының студенти.
Қолға киргизген табыслары:
– 2008-жылы өспиримлер арасында өткерилген шахмат турнириниң аймақлық басқышында қатнасқан;
– 2008-жылы «Камалак» балалар шөлкеми тәрепинен өткерилген «Алға сәрдарлар» жарысының аймақлық басқышында қатнасқан;
– 2011-жылы XXI республикалық Қуран оқыў жарысының жеңимпазы;
– 2012-жылы XXII республикалық Қуран оқыў жарысының жеңимпазы;
– 2013-жылы Кувейт мәмлекетинде болып өткен 4-айланымдағы халықаралық Қуран оқыў жарысында жақсы қатнасып, күшли онлықтан орын ийелеген;
– 2016-жылы Ташкент Ислам институтында өткерилген «Қуран зыяпаты» таңлаўының жеңимпазы;
– 2016-жылы Ташкент Ислам институтында өткерилген дәслепки азан айтыў жарысының жеңимпазы;
– 2018-жылы «Өзбекстан Қуран оқыў жарысы-2018»диң абсолютлик жеңимпазы, жоқары орын ийеси.
Қарақалпақстан хабар агентлиги