Усы жылдың 5-апрель күни Өзбекстан Республикасы Президентиниң «Мектепке шекемги билимлендириў системасын және де хошаметлеў ҳәм раўажландырыў илажлары ҳаққында»ғы қарары қабыл етилди. Бул ҳаққында Әдиллик министрлигиниң «Ҳуқуқий ахборот» каналы мәлим етти.

Қарар тийкарында мектепке шекемги билимлендириў тараўында мәмлекетлик-жеке меншиклик бирге ислесиўдиң төмендеги формалары енгизилди:

– мәмлекетлик емес бақшалар имаратларын қурыў ушын, соның ишинде хызмет көрсетиўши мәмлекетлик бақшалар аймағында турақлы пайдаланыў ушын бийпул жер участкаларын усыныў;

– бар болған мәмлекетлик мектепке шекемги билимлендириў мәкемелерин үскенелеў ҳәм реконструкциялаў шәрти менен мәмлекетлик емес мектепкешекемги билимлендириў мәкемелери объектлерин қурыў ушын бийпул жер учуасткаларын бериў;

– бос турған мәмлекетлик мүлк объектлерин, соның ишинде, жумыс ислемей турған мәмлекетлик бақшаларды «ноль»лик баҳада сатыў;

– мәмлекетлик бақшалардың пайдаланылмай турған имаратлары ҳәм корпусларын бийпул узақ мүддетли пайдаланыўға бериў.

Мәмлекетлик-жеке меншиклик бирге ислесиў формасына қарай жеке бирге ислесиўшиге төмендеги инвестициялық миннетлемелер жуклетиледи:

– социаллық қорғаўға мүтәж болған шаңарақлардан болған белгили муғдардағы тәрбияланыўшыларға жеңилликли ата-ана пулын белгилеў (усы аймақтағы мәмлекетлик мектепке шекемги билимлендириў мәкемелери ушын белгиленген муғдардан көп болмаған ҳалда);

– жеке бирге ислесиўшиге бириктирилген бақшаларды қурыў, реконструкциялаў, капитал оңлаў ҳәм үскенелеў жумысларын әмелге асырыў.

Мәмлекетлик-жеке меншиклик бирге ислесиўде шөлкемлестирилген мәмлекетлик емес бақшалар төмендегилерден азат етилди:

– еки жыл мүддетке белгиленген тәртипте тастыйықланатуғын дизим бойынша алып киргизилипатырған үскенелер, инвентарлар, оқыўлық қолланбалар ҳәм ойын майданшалары ушын бажыхана төлемлери;

– өз жумысын баслаған күннен баслап он жыл мүддет даўамында мәмлекетлик мақсетли қорларға барлық мәжбүрий төлемлер ҳәм мәжбүрий ажыратпаларды төлеў.

Сондай-ақ, 2018-жылдың 15-апрелинен хызметкерлериниң орташа жыллық саны 100 ге шекемги болған бақшалар киши исбилерменлик субъектлери қатарына киргизилди.

Қарақалпақстан хабар агентлиги