Қанлыкөл районында 8-март – «Халықаралық ҳаял-қызлар күни» мүнәсибети менен байрам кешеси болып өтти. Бул ҳаққында район ҳәкимлигиниң рәсмий веб-сайты мәлим етти.
Кешеде халық хожалығындағы өзлериниң пидәкерлик мийнетлери менен белсендилик көрсетип киятырған ҳаял-қызлар, нураный ҳажы аналар, басланғыш шөлкем жетекшилери, бир қатар үй бийкелери қатнасты.
Байрам кешеси районда жасап, мийнет етип атырған нураный аналар менен ҳаял-қызлардың турмысындағы жетискенликлери сәўлеленген видеоролик пенен басланды.
Байрам кешесинде район ҳәкими М.Қосназаров, район прокуроры А.Каримбаев, районлық ҳаял-қызлар комитети баслығы У.Оспановалар барлық ҳаял-қызларды байрам менен қутлықлап, район аймағындағы түрли тараўларда белсендилик пенен мийнет етип киятырған бир қатар ҳаял-қызларға район ҳәкиминиң «Ҳүрмет жарлығы» ҳәм байрам саўғаларын тапсырды.
Байрам кешесинде Қарақалпақстан Республикасына белгили көркем өнер шеберлери ҳәм районлық көркем-өнер тараўы хызметкерлери тәрепинен таярланған қосықлар, ҳәзиллер ҳәм аяқ ойынларынан ибарат концерт бағдарламасы усынылды.
Қарақалпақстан хабар агентлиги