Өзбекстан Республикасы Әдиллик министрлигинде усы жылы 22-февраль күни дизимге алынған «Халықтың бәнтлигин тәмийинлеў ушын коммерциялық банклер тәрепинен микрокредитлер ажыратыў тәртиби ҳаққындағы реже» талабы тийкарында пуқараларға 3 айдан 6 айға шекем жеңиллетилген ҳалда 3 жылдан көп болмаған мүддетке  ең кем мийнет ҳақының 100 есеси муғдарына шекем микрокредитлер бериледи.

Бул микрокредитлер биринши гезекте, аймақларда халқымыз ушын мүнәсип турмыс шараятларын жаратыў, исбилерменлик жумысы арқалы белгили бир мийнет түри менен шуғылланыў тилегинде жүрген пуқараларға ажыратылады.

Микрокредитлер «Микрокредитбанк» тәрепинен Әмиўдәрья, Елликқала районларындағы, «Қишлоқ қурилиш банк» тәрепинен Беруний районындағы, «Агробанк» тәрепинен Қараөзек, Тахтакөпир, Нөкис районларындағы, «Санаатқурылысбанк» тәрепинен Қоңырат, Тақыятас районларындағы, «Саўдагербанк» тәрепинен Төрткүл районындағы, «Миллий банк» тәрепинен Хожели, Шымбай районларындағы, «Халық банки» тәрепинен Мойнақ, Шоманай, Қанлыкөл районларындағы, «Асака банк» тәрепинен Кегейли районындағы, «Капиталбанк», «Инфинбанк», «Алоқабанк», «Ипотекабанк», «Туранбанк», «Ҳамкорбанк» тәрепинен Нөкис қаласындағы исбилерменлик пенен шуғылланатуғын шаңарақларға жеңилликли шәртлер тийкарында ажыратылыўы белгиленген.

Еслетип өтемиз, Өзбекстан Республикасы Президенти Шавкат Мирзиёев 2017-жыл 15-16-декабрь күнлери республикамызға сапары ўақтында Орайлық банкке коммерциялық банклер менен биргеликте республикамызда исбилерменликти раўажландырыў ушын жеңилликли кредитлер бериў көлемин кеминде 1,5 есеге арттырыў бойынша тапсырма берген еди.

– Исбилерменлик пенен шуғылланыў тилегиндеги шаңарақларды анықлаў бойынша комиссия дүзилди. Бүгинги күнге комиссия тәрепинен ҳәкимликлер менен биргеликте республикамыз бойынша исбилерменлик пенен шуғылланатуғын шаңарақлар анықланып, олардың дизими алынды, -дейди Өзбекстан Республикасы Орайлық банки Қарақалпақстан Республикасы бас басқармасының басқарма баслығы Азамат Абдикаримов. – Сондай-ақ, Орайлық банктиң Қарақалпақстан Республикасы бас басқармасы тәрепинен барлық коммерциялық банклер шаңарақлық исбилерменлерге жеңилликли кредитлер ажыратыў бойынша жуўапкер етип бириктирилди.

Д.АБИБУЛЛАЕВ,

Қарақалпақстан хабар агентлигиниң хабаршысы