Усы жылдың 27-февраль ҳәм 4-март күнлери аралығында Қырғызстан Республикасының Бишкек қаласында еркин гүрес бойынша ерлер ҳәм ҳаял-қызлар арасында Азия чемпионаты өткерилди.
Чемпионатта Өзбекстан сайланды командасы қурамындағы спортшылар 4 алтын, 5 гүмис ҳәм 6 қола медальларын қолға киргизди.
Олардың ишинде жерлесимиз – республикалық жеке гүрес түрлери бойынша қәнигелестирилген балалар ҳәм жас өспиримлер спорт мектебиниң тәрбияланыўшысы Набира Есенбаева да бар болып, ҳаял-қызлар арасында 59 килограмм салмақ категориясындағы беллесиўде гүмис медаль жеңимпазы болды.
Чемпионат жуўмағында Өзбекстан сайланды командасы улыўмакомандалық есапта 3-орынды ийеледи.
Набира Есенбаева 1998-жылы Нөкис қаласында туўылған. Спорттың жеке гүрес түри менен 8 жылдан берли турақлы шуғылланып келмекте. Ол бир неше мәрте Өзбекстан ҳәм Қарақалпақстан чемпионы. Халықаралық жарыслардың сыйлы орын жеңимпазы.
Ҳәзирде Н.Есенбаева Әзербайжан Республикасында Азия ойынларына таярлық көриў бойынша оқыў-шынығыў жыйынына қатнаспақта.
Спортшының жоқары жетискенликлерге ерисиўинде оның тренери Баҳадыр Қәлимбетовтың үлеси мол.
Тәрбия СЕЙТНАЗАРОВА,
Қарақалпақстан хабар агентлиги хабаршысы