Беруний районы турғыны Равшан Яхшимурадов Биринши Президентимиз Ислам Әбдиғаниевич Кәримовтың естелигине бағышлап Беруний районынан Ташкент қаласына шекем пияда жүрип бармақшы екенлигин билдирип, усы мәселени ғалаба хабар қуралларында кең түрде жәриялаўды сорап Өзбекстан Республикасы Президентиниң виртуал қабыллаўханасына мүрәжат етти.
Уллы инсанның естелиги ушын 1200 км жолды пияда басып өтиў идеясы пайда болғанына бираз ўақыт болды, – дейди Р. Яхшимурадов. – Беруний аўыл хожалығы кәсип-өнер колледжинде техникалық хызметкер болып ислеймен. Биринши Президентимиздиң барлық мийнетлерин оқып шыққанман. Егер усы нийетим әмелге асса, жол бойы көргенлеримди китап етип жазыў нийетим бар ҳәм мен Берунийден Ташкент қаласына шекем пияда жол басып өтиўге таярман.
Еслетип өтемиз, 2016-жылы сентябрь айында наманганлы Ҳусан Ходжибаев Биринши Президентимиздиң қәбирине велосипедте зыярат еткен еди. Сонда Ҳусан Ходжибаев велосипед пенен Наманганнан Самарқандқа шекем 500 км жолды басып өткен.
Фото: наманганлы Ҳусан Ходжибаев
Пияда зыярат етиў бойынша қарақалпақстанлы Нарымбет Өтамбетовты да атап өтиў орынлы. Ол Қарақалпақстаннан Мәккеге шекем ҳажы сапарына пияда барып қайтқан. Бул ҳаққында кейинирек толық мағлыўмат беремиз.
Сайтымызды бақылап барың.
Мөлдир Игиликова,
Қарақалпақстан хабар агентлигиниң хабаршысы